АҚШ Беларусга қарши санкцияларни янада кенгайтирди, 16 нафар жисмоний шахс, 5 та идора ва ташкилотга нисбатан чекловлар жорий қилинди, деб ёзмоқда АҚШ Молия вазирлигига таяниб «РИА Новости».
АҚШ санкция рўйхатига Беларусь МХҚ, мамлакат Ички ишлар вазирлигининг Уюшган жиноятчилик ва коррупцияга қарши кураш бош бошқармаси, ИИВ ички қўшинлари, Брестижроқўмнинг ҳарбий ишлар бошқармаси, Минскдаги ҳуқуқбузарлар изоляцияси Окрестин маркази каби идора ҳамда ташкилотлар киритилган.
Шунингдек, Беларусь президенти Александр Лукашенконинг матбуот котиби Наталья Эйсмонт, Беларусь парламенти юқори палатасининг спикери Наталья Кочанова, Беларусь ДХҚ «Альфа» махсус бўлинмаси раҳбари Сергей Зубков, Минск милицияси бошлиғи Михаил Гриб ва адлия вазири ўринбосари Сергей Калиновскийга нисбатан ҳам санкциялар жорий қилинган.
Беларуснинг Ғарб мамлакатлари билан муносабатлари 2020 йилда бўлиб ўтган президентлик сайловларидан кейин ёмонлашган. Евроиттифоқ сайловларнинг очиқ ва демократик йўл билан ўтказилганини, Александр Лукашенконинг эса президентликка сайланганини тан олмади. ЕИ, Буюк Британия, АҚШ ҳамда Канада беларуслик бир нечта расмий шахсларга, шу билан бирга республикадаги ҳукумат тарафдори бўлган корхоналарга нисбатан сиёсий ва иқтисодий чекловлар жорий этди, кейинчалик мазкур санкциялар рўйхати яна кенгайди.
Минск санкцияларга жавоб қайтарилишини, хусусан, ТИВ мазкур ҳаракатларга қарши сиёсий реакциялар билдирилишини маълум қилди. Бундан ташқари, 23 апрелда Беларусь ҳукуматининг матбуот хизмати Ғарбга нисбатан жавоб санкциялари рўйхати тузилгани, жумладан, Škoda Auto, Liqui Moly ва Beiersdorf каби немис ва чех компанияларининг маҳсулотлари тақиққа учраганини билдирди. Тақиқланган товарлар рўйхати олти ой давомида ўз кучида туради.
Аввал АҚШ президенти Жо Байден Беларусга қарши 2006 йилда киритилган санкциялар муддатини бир йилга узайтиргани, Чехия парламенти Сенати Беларусь мухолифати етакчиси Светлана Тихановскаяни мамлакат президенти деб тан олгани ҳақида хабарлар берилганди.
Изоҳ (0)