Бойиб кетишига уйда ўтириши халақит қилмаган аёллар ҳақида маълумот бериб ўтамиз.
Жой Мангано
Ушбу аёлнинг тақдири ҳақида «Жой» номли фильм экран юзини кўргандан кейин ҳамма маълумотга эга бўлган. Турмуш ўртоғи билан ажрашган Мангано ихчам квартирада уч нафар фарзанди билан ёлғиз қолган. Аввалига иш топишга уринган аёлнинг мушкул вазиятдан чиқишига хаёлига келган ажойиб фикр сабаб бўлган. У сувини сиқиш учун қўллар билан латтага тегинишга ҳожат бўлмаган полювгич ўйлаб топган. Орадан бир неча ой ўтиб эса рўзғор буюмлари ўрин олган дўкон ичишга муваффақ бўлган. Аммо ушбу бизнесидан деярли даромад келмайди. Шундан кейин аудиториясини аниқлаб, теледўкон билан шартнома тузади. Телеекран орқали ўз маҳсулотининг афзалликлари ҳақида айтиб берганидан кейин, 18 минг дона полювгич сотиб олинади. Шу йўсинда давом этганидан Жой 2 йил ўтиб йиллик даромади 1 миллион долларни ташкил қиладиган компания эгасига айланади. Бу билан чекланиб қолмаган Мангано уйни хушбўй қиладиган воситалар, қисқичли ва сирпанмайдиган кийим илгичлар ҳамда бошқа керакли буюмларни ишлаб чиқаради.
Ким Левин
Бош ва бўйин мушаклари учун фойдали бўлади, деб ёстиқ ичига жўхори донини солиш хаёлига келган Ким унда ётиш қулай бўлишини тушуниб етган. Кейинчалик бундай ёстиқни қиздириш янада яхши самара беришига гувоҳ бўлган. Дўст ва қариндошларига совға қилиб улашганидан кейин маҳсулотини реклама қилишга киришган.
Тузилган шартномадан кейин омади келган Левин тушган даромадини маҳсулотини такомиллаштириш ва машҳур бўлишига сарфлаган. Бугунги кунда у миллионлаб маблағ келтирадиган компаниянинг эгаси ҳисобланади. Унинг йиллик даромади 700 миллион долларни ташкил қилади.
Шери Шмельцер
Шерининг фарзандлари тешикли шиппакларни яхши кўрган. Аёл болаларининг пойабзалларини қизиқарли қилишни истаб, тешикларни турли нарсалар, аввалига гул, кейин тугма ҳамда лойдан ясалган шакллар билан безаган. Бундай пойабзалларни болалари мактабга кийиб борганидан кейин бошқа ота-оналар ҳам ундан фарзандларининг пойабзалларини шундай безаб беришни илтимос қилган. Ертўласида ишлаб чиқаришни йўлга қўйган аёл жиббиц деб атаган ижод намунасининг бир донасини 3 долларга сотган. Орадан бир йил ўтиб, дунё бўйича шундай оёқ кийимлардан 8 миллионта харид қилинган. Шмельцер эса ўз маҳсулотини Crocs компаниясига 20 миллион доллар эвазига сотиб юборган.
Татьяна Бакальчук
Уй бекаси бўлган Татьяна ўз хонадонида болаларга инглиз тилидан дарс ўтган. Фарзандли бўлганидан кейин эса уйда ўқувчи қабул қилишнинг иложи бўлмаган. Интернет орқали савдо қилиш Россияда ҳали йўлга қўйилмаган бир вақтда аёл бу ишни амалга оширишга ҳаракат қилиб кўрган. У ҳеч нима ишлаб чиқармаган, шунчаки бир савдогардан олган молларини интернетда сотишга уринган. Турмуш ўртоғи қўллаб-қувватлаган аёл бир йил ўтиб Россиядаги илк онлайн дўкон Wildberries’нинг эгасига айланган. Biznesi.ru доменидаги энг қиммат компаниялар рейтингидан ўрин олган Бакальчук Bloomberg Billionaires Index маълумотларига кўра Россиянинг энг бадавлат россиялик аёллар Топ 15 рўйхатидан ўрин олган. Унинг молиявий аҳволи 10,1 миллиард долларга баҳоланади.
Изоҳ (0)