Андижонда Президент ташрифи олдидан кўчалар бўйида арчалар экилгани, ташриф якунлангач экилган арчалар ва гуллар қайта кавлаб кетилгани айтилган видео тарқалди. Вилоят ҳокимлиги мазкур воқеа юзасидан муносабат билдирди.
Қайд этилишича, видеолавҳада акс эттирилган ҳолат шаҳар ободонлаштириш бўлими томонидан ҳудудда ободонлаштириш ишлари олиб борилаётган вақтда тасвирга туширилган. Ободонлаштириш ишлари олиб бориш жараёнида гулларга шикаст етмаслиги учун улар тасвирда акс этган автомашина ёрдамида соя-салқин жойга бир оз муддатга кўчириб турилган.
«Йўлнинг 50 метр узунликдаги қисмида олиб борилган бу тадбир давомида экологлар тавсиясига кўра, қайта ўтқазилган кўчатларнинг янада ўсиб ривожланиши учун зарур агротехник шарт-шароит яратилган. Айни пайтда бу манзарали буталар яна ўз жойига қайта ўтқазилган», — дейилади ҳокимлик муносабатида.
Шавкат Мирзиёев ҳудудлардаги ўзгаришлар, аҳоли ҳаёти билан яқиндан танишиш мақсадида 17—18 июнь кунлари Андижонда бўлган эди. Ҳокимлик хабарида арчалар ва гуллар қачон салқинга олингани ва яна ўрнига қайтарилганига аниқлик киритилмаган. Машинада олиб кетилаётган арча масаласига ҳам изоҳ берилмаган.
Эслатиб ўтамиз, 2020 йилнинг ноябрида Президент ташрифи арафасида Қашқадарё вилояти маъмурий маркази Қарши шаҳрида йўл бўйидаги чимлар яшил рангга бўяб чиқилаётгани акс этган фото ва видеолар ижтимоий тармоқларда тарқалганди. Президентнинг ўзи 2018 йилдаёқ унинг ҳудудларга ташрифи арафасида ҳозирланаётган кўзбўямачиликлар уни ранжитишини айтиб ўтганди.
Изоҳ (0)