Andijonda Prezident tashrifi oldidan ko‘chalar bo‘yida archalar ekilgani, tashrif yakunlangach ekilgan archalar va gullar qayta kavlab ketilgani aytilgan video tarqaldi. Viloyat hokimligi mazkur voqea yuzasidan munosabat bildirdi.
Qayd etilishicha, videolavhada aks ettirilgan holat shahar obodonlashtirish bo‘limi tomonidan hududda obodonlashtirish ishlari olib borilayotgan vaqtda tasvirga tushirilgan. Obodonlashtirish ishlari olib borish jarayonida gullarga shikast yetmasligi uchun ular tasvirda aks etgan avtomashina yordamida soya-salqin joyga bir oz muddatga ko‘chirib turilgan.
“Yo‘lning 50 metr uzunlikdagi qismida olib borilgan bu tadbir davomida ekologlar tavsiyasiga ko‘ra, qayta o‘tqazilgan ko‘chatlarning yanada o‘sib rivojlanishi uchun zarur agrotexnik shart-sharoit yaratilgan. Ayni paytda bu manzarali butalar yana o‘z joyiga qayta o‘tqazilgan”, — deyiladi hokimlik munosabatida.
Shavkat Mirziyoyev hududlardagi o‘zgarishlar, aholi hayoti bilan yaqindan tanishish maqsadida 17—18-iyun kunlari Andijonda bo‘lgan edi. Hokimlik xabarida archalar va gullar qachon salqinga olingani va yana o‘rniga qaytarilganiga aniqlik kiritilmagan. Mashinada olib ketilayotgan archa masalasiga ham izoh berilmagan.
Eslatib o‘tamiz, 2020-yilning noyabrida Prezident tashrifi arafasida Qashqadaryo viloyati ma’muriy markazi Qarshi shahrida yo‘l bo‘yidagi chimlar yashil rangga bo‘yab chiqilayotgani aks etgan foto va videolar ijtimoiy tarmoqlarda tarqalgandi. Prezidentning o‘zi 2018-yildayoq uning hududlarga tashrifi arafasida hozirlanayotgan ko‘zbo‘yamachiliklar uni ranjitishini aytib o‘tgandi.
Izoh (0)