Наманган вилояти Янгиқўрғон туманида ўзгаларнинг қорамолларини ўғирлаш билан шуғулланиб келган уч кишидан иборат гуруҳ аниқланди. Бу ҳақда вилояти ИИБ ахборот хизмати хабар берди.
Маълум қилинишича, 15 июнь кунига ўтар кечаси Янгиқўрғон туманида яшовчи 16, 17 ва 23 ёшли йигитлар 1981 йилда туғилган фуқаронинг яшаш уйи ҳовлисига девор ошиш йўли билан кириб, дарахтга боғлаб қўйган нархи 15 миллион сўмлик икки бош молларини ўғирлаб кетган.
Улар ўзларининг жиноий ҳаракатларини давом эттириб, шу куннинг ўзида 1979 йилда туғилган фуқаронинг яшаш уйи ҳовлисига кириб, молхонасида бўлган нархи 15 миллион сўмлик икки бош молини, шунингдек, 43 ёшли фуқаронинг молхонасидан 20 миллион сўмлик икки бош молини ўғирлаб кетган.
Ушбу ҳолат бўйича Янгиқўрғон туман ИИБ ҳузуридаги Тергов бўлими томонидан Жиноят кодексининг 169-моддаси (ўғрилик) 3-қисми билан жиноят иши қўзғатилган.
Аввалроқ Марғилонда овсинининг 8 млн сўмлик тилла тақинчоқлари ва пулларини ўғирлаган аёлга жиноят иши қўзғатилгани, Фарғонада қайнанасининг пластик картасидаги пулларни ўғирлаган куёв қўлга олингани, Қашқадарёда қўшниларининг қўй-қўзиларини ўғирлаб, сўйиб сотишни касб қилиб олган шахс 3 йил муддатга озодликдан маҳрум қилингани тўғрисида хабар берилганди.
Изоҳ (0)