Тошкент вилояти ИИББ ходимлари томонидан қалбаки доллар савдоси бўйича ярим йилдан буён қидирувда бўлган шахс ушланди. Бу ҳақда идора матбуот хизмати хабар берди.
Маълум қилинишича, 2021 йилнинг январь ойида Чимёнда фуқароларга қалбаки долларни «ўтказиб» кетган уч нафар шахснинг икки нафари қўлга олинган ва учинчисига нисбатан қидирув эълон қилинган.
Ушбу ҳолатнинг иштирокчиси бўлган учинчи шахс 1984 йилда Қўқон шаҳрида туғилган Ж.Ш. бўлиб, у тергов органларидан яшириниб юрган.
15 июнда қидирувдаги шахснинг яширинган манзили ИИББ хавфсиз туризмни таъминлаш тезкор ходимлари томонидан аниқланган ва у қўлга олинган. Гумонланувчи қонуний чора кўриш учун ИИБга олиб келинган.
Аввалроқ Тошкентда қидирувдаги шахс ниқоб тақмагани сабаб қўлга тушгани, Ўзбекистонда қидирувда бўлган шахс Россияда қўлга олингани тўғрисида хабар берилганди.
Изоҳ (0)