Тошкентнинг Чилонзор туманидаги Муқимий—Чилонзор кўчалари чорраҳасида жойлашган кўп қаватли уй деворида Чўлпон (Абдулҳамид Сулаймон ўғли Юнусов) хотирасига бағишланган стрит-арт пайдо бўлди. Ушбу ижод намунаси Абдулла Қодирийнинг хотирасига бағишланган суратнинг ёнгинасига чизилган. Бу ҳақда «Дарё» мухбири хабар бермоқда.
Кўча санъати намунасини @inkUZart тахаллуси билан ижод қилаётган кўча рассоми Абдураҳмон Умаров чизган. Қўшимча қилиш керакки, стрит-арт намуналарининг ёнига «To be continued...», яъни «Давоми бор...» ёзувли табличка ҳам илиб кетилган.
Айтиш керакки, ушбу Чўлпон сурати туширилган стрит-арт намунасининг яратилиш жараёнининг бошланиши акс этган видео дастлаб блогер Ферузхон Ёқубхўжаевнинг Instagram саҳифасида пайдо бўлган.
Аввалроқ @inkUZart ушбу деворга Абдулла Қодирийнинг тасвири ва ёнига «Аҳволимиз» номли ғазалини туширгани, Тошкентдаги бинолар деворларини коронавирус пандемияси мавзусидаги граффитилар билан безаётгани тўғрисида хабар берилганди.
2020 йилнинг ёзида Абдураҳмон Умаров Чилонзор туманидаги даҳаларни турли тасвирлар билан «бойитиш» ниятида эканини маълум қилганди. «Чилонзорни галереяга айлантирмоқчиман. Кейин эса бошқа туманлар, шаҳарлар, мамлакатлар ва қитъаларга ўтаман» деган эди ўшанда.
Изоҳ (0)