Тошкент шаҳар божхона бошқармаси контрабандага қарши курашиш ва божхона аудити бўлими ходимлари «Чуқурсой техник-идора» ҳамда «Тошкент-товар» божхона пости ходимлари билан ҳамкорликда навбатдаги қонунбузарликни фош этди. Бу ҳақда Давлат божхона қўмитаси хабар қилди.
Унга кўра, Ўзбекистонда фаолият юритувчи тадбиркорлик субъекти хориждан ўз корхонаси номига 4 та юк контейнерида технологик асбоб-ускуналар буюртма беради.
Бироз муддат ўтгач, мазкур 4 та контейнер «Чуқурсой техник идора» темир йўл чегара божхона пости орқали мамлакат ҳудудига кириб келади.
Шундан сўнг божхона ходимлари пост ҳудудида ўрнатилган инспексион кўрик мажмуасидан олинган ренгент тасвирлар ҳамда мазкур контейнерларга тегишли юк ҳужжатларини ўзаро солиштириш асосида божхона назоратидан ўтказади.
Натижада юк ҳужжатларига кўра «томчилатувчи лентани ишлаб чиқариш линияси» дея кўрсатилган товарларнинг ренгент тасвирлари ва юк ҳужжатларидаги маълумотлар ўртасида тафовутлар аниқланди.
Божхона кўриги давомида қиймати 4 миллиард 303 миллион сўмлик, 115 654 дона кийим-кечак, 15,7 тонна гранула товари ҳамда металл жавонлар контейнерларга тегишли юк ҳужжатларида умуман қайд этилмагани аниқланди.
Шунингдек, ҳужжатларда кўрсатилган «томчилатувчи лентани ишлаб чиқариш линияси» технологик асбоб ускуналари ҳам муқаддам фойдаланишда бўлганлиги, шунингдек, ускуна қисмлари фойдаланишга яроқсиз ҳамда занглаган ҳолда эканлиги маълум бўлди.
Ҳозирда мазкур ҳолат юзасидан божхона органлари томонидан суриштирув ҳаракатлари олиб борилмоқда.
Бундан аввал Ўзбекистонда 676 турдаги технологик ускуналар импорт божи ва ҚҚСдан озод қилингани, Фарғонада 144 миллион сўмлик тамаки маҳсулотларининг ноқонуний айланмасига чек қўйилгани ҳамда Ўзбекистондан 163 гр олтин қуймасини оғиз бўшлиғида ноқонуний равишда олиб чиқиб кетмоқчи бўлган шахс аниқлангани ҳақида хабар берилганди.
Изоҳ (0)