Тошкент шаҳрида апрель—июнь ойларида ўтказилган ДХХ раиси кубогининг тақдирлаш маросими бўлиб ўтди. Бу ҳақда «Дарё»га ДХХ матбуот хизмати хабар қилди.
Қайд этилишича, Ўзбекистон Давлат хавфсизлик хизматининг Қорақалпоғистон Республикаси, вилоятлар ҳамда Тошкент шаҳар бошқармалари бошлиқлари кубоги ўтказилди.
Мусобақанинг дастлабки босқичларида 18—30 ёш оралиғидаги маҳалла ёшларидан таркиб топган 7779 та жамоа иштирок этди. Туман, шаҳар ҳамда вилоят (Қорақалпоғистон Республикаси) босқичларида ғолибликни қўлга киритган энг сара 14 та жамоа 12—15 июнь кунлари Тошкентдаги «Бунёдкор» стадионида ДХХ раиси кубоги учун ўзаро куч синашди.
Турнирнинг финал босқичида Қашқадарё вилояти Қамаши тумани «Самарқанд» МФЙ жамоаси биринчи ўринни қўлга киритган бўлса, Сирдарё вилояти Гулистон шаҳри «Тараққиёт» МФЙ жамоаси иккинчи, Жиззах вилояти Зомин тумани Ғафур Ғулом номидаги маҳалла жамоаси эса учинчи ўринни эгаллади. Қорақалпоғистон Республикаси Нукус тумани «Оқ Манғит» МФЙ жамоаси эса ярим финалга қадар муваффақиятли ўйин намойиш этиб, кучли тўртликни якунлаб берди.
Эндиликда биринчи ўринни эгаллаган жамоага улар истиқомат қиладиган маҳаллада мини-футбол майдончаси, иккинчи, учинчи ва тўртинчи ўринларни қўлга киритган жамоаларга эса улар яшайдиган маҳаллада Street Workout майдончалари қуриб берилади.
Шунингдек, мусобақалар якунига кўра «Энг яхши ўйинчи» номинациясида Фарғона вилояти жамоаси аъзоси Фазлиддин Содиқов, «Энг яхши тўпурар» йўналишида Сирдарё вилояти шарафини ҳимоя қилган Фаррух Бектемиров,«Энг яхши дарвозабон» деб Бухоро вилояти жамоаси вакили Сирож Салимов ҳамда «Энг яхши мураббий» номинациясида Қорақалпоғистон жамоаси устози Серик Жалгасов муносиб кўрилди.
Бундан ташқари, ДХХ раиси кубогининг республика босқичида иштирок этган 14 та жамоанинг ҳар бир аъзосига спорт велосипедлари, уларнинг мураббийларига эса қимматбаҳо совғалар топширилди.
Тақдирлаш маросими таниқли хонандалар иштирокидаги концерт дастури билан давом этди.
ДХХ раиси кубоги мусобақалари 2022 йили нафақат мини-футбол, балки, катта футбол бўйича ҳам ўтказилиши таъкидланган.