Наманган вилояти Наманган туманидаги кўчаларнинг бири сувларни чиқарувчи қувур чиқиндига тўлиб қолгани сабаб сув остида қолди. Бу ҳақда вилоят ФВБ матбуот хизмати хабар берди.
Маълум қилинишича, «Катта Тошбулоқ» МФЙ Мустақиллик кўчасидан оқиб ўтувчи «Зак ариқ қувури» закоб сувларини чиқарувчи қувурларга тош, хашак ва турли чиқиндилар оқиб келиб, қувур ўтказгичларнинг ички қисмида тўпланиб қолган. Оқибатда сув ён атрофларга ҳамда йўлнинг қатнов қисмига тошиб чиққан.
Ушбу ҳолатни бартараф этиш мақсадида вилоят Фавқулодда вазиятлар бошқармаси, Наманган тумани фавқулодда вазиятлар бўлими, туман фавқулодда вазиятлар давлат қуйи тизимлари билан биргаликда ишлар олиб борилган.
Эслатиб ўтамиз, 2021 йилнинг май ойида Наманганда кузатилган сел тошқинлари автомобиль ва поезд йўлига зарар етказганди.
Изоҳ (0)