Бугундан Андижон вилоятидаги иқтисодий комплекснинг барча раҳбар ходимлари ишдан олиниб, уч ой муддатга вазифасини бажарувчи этиб тайинланади. Бу ҳақда айни пайтда Президент Шавкат Мирзиёев раислигида вилоят фаоллари билан ўтказилаётган йиғилишда давлат раҳбари маълум қилди, дея хабар бермоқда «Дарё» мухбири.
«Ҳозирги кунда вилоятдаги маҳаллаларнинг аксарияти ўзининг ‘ўсиш нуқта’ларини аниқлаб олган бўлишига қарамай, 100 та маҳалла ҳалигача ўз ихтисослашув йўлини топмаган. Шу боис, 200 та маҳаллани ривожлантиришга вилоят ҳокимлиги ва иқтисодий комплекс масъул бўлади.
Бугундан иқтисодий комплекснинг барча раҳбар ходимлари ишдан олиниб, уч ой муддатга вазифасини бажарувчи этиб тайинланади. Иқтисодий комплекс ва тижорат банклари барча ходимлари идорага кирмасдан уч ой ичида мазкур маҳаллалардаги ҳар бир хонадонга кириб, аҳолининг турмуш шароити, истак-хоҳиши ва имкониятларини ўрганиб чиқади. Шунга кўра, уларга ўз тадбиркорлигини йўлга қўйиш учун бизнес-режа қилиб беради.
Умуман тадбиркорлик қўлидан келмайдиган оилаларга 100 тадан товуқ берилади. Вилоят ҳокими Абдураҳмонов ушбу маҳаллаларнинг ҳар бирига салоҳиятли тадбиркорларни бириктиради. Бундай тадбиркорларга банклар томонидан 3 йил муддатга 10 фоиздан кредит ажратилади ва улардан гаров талаб қилинмайди.
Бу кредитлар учун Тадбиркорликни қўллаб-қувватлаш жамғармаси кафиллик беради. Ушбу мақсадлар учун 200 та маҳаллага 400 миллиард сўм, яъни ҳар бир маҳаллага 2 миллиард сўмдан алоҳида ресурс ажратамиз. Бунда энг оғир аҳволдаги маҳаллалар инобатга олиниб, уларнинг аҳволини яхшилаймиз, ривожлантирамиз», — дейди Шавкат Мирзиёев.
Давлат раҳбарининг таъкидлашича, бу ишларга бош вазир ўринбосари Жамшид Қўчқоров, молия вазири Тимур Ишметов, Марказий банк раиси Мамаризо Нурмуратов, Икрамов, Андижон вилояти ҳокими Шухрат Абдураҳмонов ва тижорат банклари раҳбарлари шахсан масъул бўлади.
Мавзуга доир: «Андижондаги 100 та маҳалла ҳалигача ўз ихтисослашув йўлини топмаган» — Шавкат Мирзиёев
Изоҳ (0)