Prezident Shavkat Mirziyoyev raisligida Andijon viloyat faollari bilan o‘tkazilayotgan yig‘ilishda davlat rahbari viloyat iqtisodiy kompleksining barcha xodimi ishdan bo‘shatilganini ma’lum qildi. Bu haqda “Daryo” muxbiri xabar bermoqda.
“Bu safargi tashrif davomida viloyat rivojiga kuchli turtki beradigan yangi “o‘sish nuqta”larini shakllantirish va to‘liq ishga solish, aholi hayotini yaxshilash bo‘yicha asosiy yo‘nalish va vazifalarni belgilab olsak, ayni muddao bo‘ladi”, — deydi Prezident.
Davlat rahbarning so‘zlariga ko‘ra, bugundan boshlab Andijon viloyatida iqtisodiy kompleksda ishlovchi 5700 nafar xodimning barchasi ishdan bo‘shatiladi.
“Hammasi! Ular 3 oy sinov muddati beriladi, agar aravani torta olsa, ishga tiklanadi, oyligini ham beramiz, kerak bo‘lsa mukofot ham beramiz. Qani, ular ham muammolarni o‘zlarida his qilib ko‘rsin. Menga nasihat qiluvchilar kerak emas, natija ko‘rsatuvchi ijro organi kerak. Hamma sharoit yaratib berdimmi, endi xalqqa xizmat qilinglar, natija ko‘rsatinglar”, — deya ta’kidlaydi Shavkat Mirziyoyev.
Avvalroq davlat rahbari Andijondagi iqtisodiy kompleksning barcha rahbar xodimlari ishdan olinib, uch oy muddatga vazifasini bajaruvchi etib tayinlanganini aytgandi.
Izoh (0)