Аҳоли ўртасида пиёда юриш ва югуришни оммалаштириш мақсадида «Соғлом турмуш тарзи» платформаси ишга туширилди, деб хабар беради Spot.
Маълум қилинишича, «1hls.uz» сайти орқали керакли мобил дастурни iOS ва Android’лар учун юклаб олиш мумкин.
Рўйхатдан ўтиш учун ONE ИД аккаунти талаб этилади. Рўйхатдан ўтиб бўлгач, фойдаланувчи ўзи ҳақидаги маълумотларни (бўйи, оғирлиги, яшаш жойи) тўлдириши ва дастурга юрилган қадамларни кузатиш имкониятини тақдим этиши керак.
Мобил дастурнинг Android версияси ҳозирга қадар 10 минг мартадан ортиқ юклаб олинган. Дастур рейтинги ҳозирча беш юлдуздан иккита тўплаган — фойдаланувчилар рўйхатдан ўтишнинг имкони бўлмаётганидан шикоят қилмоқда, Google эса шахсий маълумотлардан фойдаланишга рухсат беришга уринишларни блоклаяпти.
App Store’да ҳам мобил дастурнинг рейтинги ҳозирча иккита юлдуз — фойдаланувчилар пул тўланмаётганини таъкидламоқда.
Дастурнинг бош саҳифасида у тест режимида ишлаётгани ва пуллар ўтказилмаётгани тўғрисида тез-тез хабарнома пайдо бўлмоқда. Бироқ ижтимоий тармоқларда ҳозирга қадар пул ўтказилган инсонларнинг постларини ҳам учратиш мумкин.
Эслатиб ўтамиз, 2020 йилнинг октябрида «Соғлом турмуш тарзини ҳаётга кенг татбиқ этиш ва оммавий спортни янада ривожлантириш чора-тадбирлари тўғрисида» Президент фармони қабул қилинган. Унга кўра:
- Ўзбекистон ҳудудида бир сутка давомида ўн минг ва ундан ортиқ қадам юрган 18 ва ундан юқори ёшдаги Ўзбекистон Республикаси фуқаросининг платформадаги электрон ҳамёнига 3 минг сўмдан;
- ҳар ойда ҳар бир туман (шаҳар) бўйича энг кўп юрган шахсга 300 минг сўмдан, ҳар бир ҳудуд бўйича энг кўп юрган шахсга 500 минг сўм, республика бўйича энг кўп юрган шахсга 1 миллион сўм қўшимча равишда платформадаги электрон ҳамёнига ўтказилади.
Изоҳ (0)