Айни пайтда Президент Шавкат Мирзиёев раислигида Андижон вилояти фаоллари билан ўтказилаётган йиғилишда давлат раҳбари соғлиқни сақлаш тизимида мураккаб операцияларга муҳтож, эҳтиёжманд аҳолига ёрдам бериш бўйича вилоятда махсус жамғарма ташкил этилишини қайд этди, дея хабар бермоқда «Дарё» мухбири.

Фото: «Дарё»

«Шунингдек, бу йил вилоятда 4 та оилавий поликлиника ва 9 та оилавий шифокорлик пункти фаолияти йўлга қўйилади. 2021 йилда вилоятда 1 миллион 500 минг аҳолини тиббий кўрикдан ўтказилади, жумладан, 300 мингдан ортиқ аёлларни маммографик ва ультратовуш текширувларидан ўтказилади.

Қўрғонтепа ва Шаҳрихон туманлари учун жароҳатларни ва ўткир қон томир касалликларини даволайдиган марказлар фаолияти ҳамда гемодиализ хизмати йил охиригача йўлга қўйилади», — деди Президент.

Давлат раҳбари масъул ташкилотлар раҳбарларига йил якунигача буйрак кўчириш операциясини амалга оширадиган мутахассисларни тайёрлаш чораларини кўриш ва 2022 йилдан бошлаб буйрак трансплантацияси бўйича жарроҳликни вилоятда жорий этиш бўйича топшириқ берди.

Аввалроқ Ўзбекистон ҳукуматининг 8 апрелдаги қарори билан Соғлиқни сақлаш вазирлиги ҳузурида онкогематологик ва даволаш қийин бўлган касалликларга чалинган беморларни соғломлаштиришга кўмаклашиш жамғармаси ташкил этилаётгани ҳақида хабар берилган эди.

2020 йил декабрида Республика ихтисослаштирилган онкология ва радиология илмий-амалий тиббиёт марказида Соғлиқни сақлаш вазирлигининг кўмагида «Ишонч» хайрия жамоат фонди ташкил этилганди.