Shavkat Mirziyoyev Andijonda metall konstruksiyalar korxonasi tashkil etishga ko‘rsatma berdi
Shavkat Mirziyoyev Andijon viloyatiga ikki kunlik amaliy tashrifini Izboskandagi to‘qimachilik korxonasini borib ko‘rishdan boshlagandi. Shundan so‘ng davlat rahbari Paxtaobod tumanidagi innovatsion issiqxonani borib ko‘rdi.
Prezident matbuot xizmatining xabar berishicha, ushbu issiqxonaning innovatsionligi shundaki, bu joy ilgari tosh-shag‘al karyeri bo‘lgan. Yerdan unumli foydalanish siyosati natijasida u ekinzorga aylantirildi. Mega agro mas’uliyati cheklangan jamiyati bu yerda Ispaniya texnologiyasi asosida issiqxona qurdi.
“Bu texnologiyada ekin polietilen quvurchalar orqali sug‘oriladi. Eng muhimi, suv isrof bo‘lmaydi, doimiy aylanib turadi. Tadbirkor uchun 16 gektar yer ajratilgan. Shundan 6 gektarida ochiq va yopiq issiqxona tashkil etilgan. Yana 2 gektarda Turkiya va Ispaniyadan olib kelingan zamonaviy uskunalar o‘rnatilmoqda”, — deb ta’kidlangan xabarda.
Ma’lum qilinishicha, issiqxonalarda “Aysberg” karami, pomidor, bodring, ularning ko‘chatlari va har xil ko‘katlar yetishtiriladi. Ularni yurtimiz bozorlariga yetkazib berish, shuningdek, yiliga 1 million 500 ming dollarlik eksport qilish rejalashtirilgan. Korxonada 100 ta ish o‘rni yaratilgan.
Davlat rahbari Andijonda metall konstruksiyalar korxonasi tashkil etib, chetdan sotib olinayotgan materiallarni mahalliylashtirish, xususan, issiqxona detallarini ishlab chiqarish bo‘yicha topshiriq berdi. Andijon qishloq xo‘jaligi instituti viloyatda agrar sohani innovatsion rivojlantirishga akselerator bo‘lishi kerakligi ta’kidlandi.
Eslatib o‘tamiz, davlat rahbarining ikki kunlik amaliy tashrifi davomida to‘qimachilik, agrosanoat va qishloq xo‘jaligi korxonalari faoliyati bilan tanishish, bunyodkorlik ishlarini ko‘zdan kechirish rejalashtirilgan. “Yangi Andijon” shaharchasi qurilishining boshlanishi tashrifning eng muhim voqealaridan biri bo‘ladi.
