Дунё ва ўзбек спортига оид 17 июнь кунининг муҳим хабарлари дайжести билан танишинг.
Эриксеннинг юрагига мослама ўрнатилади
«Интер» клуби ва Дания терма жамоаси ярим ҳимоячиси Кристиан Эриксеннинг юрагига кардиовертер-дефибриллятор ўрнатилади. Финляндияга қарши ўйинда юрак билан боғлиқ муаммодан бошдан кечирган футболчи даниялик ва халқаро мутахассислар тавсияси билан шу қарорга келган.
Кардиовертер-дефибриллятор — ҳаётга хавф соладиган аритмия ва юрак тўхтаб қолишини олдини олишга мўлжалланган мослама. У беморнинг кўкрак қисмига имплантация қилинади.
Рамос билан хайрлашган «Реал» Варан билан янги шартнома имзолашга яқин
«Реал» марказий ҳимоячиси Рафаэл Варан катта эҳтимол билан мадридликлар сафида қолади. «Қаймоқранглилар» шартномани узайтириш борасида 28 ёшли футболчи билан деярли келишувга эришган.
Франциялик футболчининг «Реал» билан амалдаги шартномаси 2022 йилнинг ёзига қадар мўлжалланган. Аввалроқ Мадрид клуби Варанни келаси ёзда текинга қўйиб юбормаслик учун 2021 йилги ёзги трансфер ойнасида сотишга тайёрлиги хабар қилинганди.
«Реал»да 117 йилдан бери кузатилмаган ҳолат
Рамос кетганидан кейин «Реал»нинг асосий сардори Марсело бўлади. Унинг ўринбосарлари французлар — Карим Бензема ва Рафаэл Варан бўлади. Шу тариқа 1904 йилдан бери илк бор испаниялик бўлмаган футболчи «Реал» сардорига айланади.
Трансфер янгиликлари
«ПСЖ» «Интер» ҳимоячиси Ашраф Ҳакими трансфери устида ишламоқда. Парижликлар 22 ёшли марокашлик футболчи учун 60 миллион евро таклиф қилмоқда, бироқ миланликлар 75 миллиондан камига рози бўлмоқчи эмас. «ПСЖ» Ашрафнинг ўзига йиллик 8 миллион евро (қўшимча 2 млн бонус) маошга 5 йиллик шартнома таклиф қилмоқда. Футболчига «Челси»дан ҳам қизиқиш бор, бироқ лондонликлар ўйинчи алмашиш ёки нархни туширишни истамоқда.
Буффон «Парма»га қайтди
«Ювентус» билан амалдаги шартномаси ниҳоясига етган Жанлуижи Буффон 20 йиллик танаффусдан кейин собиқ жамоаси сафига қайтди. Б Серияга тушиб кетган клуб бу ҳақда расман эълон қилди. Буффон бу орқали мунтазам ўйин амалиётига эга бўлмоқчи ва Италия билан ЖЧ—2022 га бориш истагида. Аввалроқ Буффон бу мақсад йўлида «Барселона»нинг захира дарвозабони сифатида ўйнаш вариантидан воз кечганди.
Гаттузо бошламасдан тугатди
Май ойида «Наполи»ни тарк этиб, «Фиорентина» бош мураббийига айланган Женнаро Гаттузо флоренсияликлар клубини ҳам тарк этди. Қайд этилишича, мутахассиснинг қарашлари раҳбариятники билан мос келмаган. Николо Скирага кўра, 43 ёшли мутахассис «Тоттенҳэм» бош мураббийига айланади. Томонлар келишувга эришгани хабар қилинмоқда.
MMA
Усмон Нурмагомедов Bellator 263 да жанг қилади. UFC собиқ чемпиони Ҳабиб Нурмагомедовнинг амакиваччаси Bellator’даги иккинчи жангини ўтказади. Унга АҚШ вакили Менни Муро рақиб бўлади. Жанг 31 июль куни бўлиб ўтади.
Зарруҳ Адашевнинг навбатдаги жанги бекор қилинди. UFC мутлақ енгил дивизионида ҳаракат қилаётган Зарруҳнинг Хуанкамило Рондеросга қарши жанг ҳам бекор қилинди. Адашевнинг айтишича, рақиб номаълум сабабга кўра жангдан бош тортган. Мазкур тўқнашув 31 июль санасига белгиланганди. Шу тариқа 5 ҳафта ичида Адашевнинг кетма-кет иккита жанги бекор қилинди. Май ойида унинг Райан Бенуа қарши жанги бекор бўлганди.
Теннис
«Улкан тож» таснифидаги мусобақаларнинг 20 карра ғолиби Рафаэль Надаль Англия ўтадиган Uimbldon мусобақаси ва Токио—2020 Олимпиадасини ўтказиб юборади. Бу ҳақда спортчининг ўзи маълум қилди. Аввалроқ испаниялик теннисчи Ролан Гаррос мусобақасида Новак Жоковичга мағлуб бўлиб, мусобақани тарк этганди.
Rolan Garros ва Uimbldon мусобақалари орасидаги танаффус икки ҳафтани ташкил қилади.
Олимпиадада мухлислар бўлади
Япония ҳукумати Олимпия ўйинларида спорт мусобақаларига 10 минггача томошабин киритилишига рухсат беришни режа қилмоқда. Бу ҳақда ҳукуматдаги манбасига таяниб, Kyodo хабар қилмоқда. Якуний қарор Олимпиада ижроқўми, Токио шаҳри раҳбарияти, ХОҚ ва ХПҚ муҳокамасидан ўтганидан кейин қабул қилинади.
Эслатиб ўтамиз, 2021 йилнинг 23 июлидан 8 августига қадар ўтказиладиган Олимпиада чет эллик мухлисларсиз ўтади. Мусобақаларга фақат маҳаллий мухлислар кириши мумкин бўлади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)