Евро—2020. Нидерландия Алаба бошлиқ Австрияга, Бельгия эса Эриксенсиз қолган Данияга қарши. Шевченко жамоаси дебютант билан ўйнайди

Футбол бўйича Евро—2020 мусобақасининг 2-турнинг навбатдаги ўйинлари 17 июнь, пайшанба куни бўлиб ўтади. Ўтган турда аламли мағлубиятга учраган Украина Бухарестда Шимолий Македонияга қарши баҳс олиб борса, Дания Копенгагенда Бельгия билан ўзаро ҳисоб-китоб қилади. Куннинг охирги учрашуви Нидерландия ва Австрия жамоалари ўртасида бўлиб ўтади. Улар C гуруҳи етакчилиги учун баҳс олиб боради.

Нидерландия

Френки де Йонг яна майдон марказида ҳукмронга айланадими?

Нидерландия терма жамоасида ҳар доим индивидуал маҳоратга эга бўлган футболчилар тўп сурган. Ҳозирги Нидерландия ҳам бундан мустасно эмас. Бошқа футболчилардан ажралиб турадиган ва масъулиятни ўз бўйнига олишдан қўрқмайдиган футболчилар бор. Украинага қарши ўйинда бу вазифани «Барселона» ярим ҳимоячиси Френки де Йонг бажарди. У майдонда кенг кўламни ишларни бажарди, жамоасининг ҳужумларини ташкил қилишда жонбозлик кўрсатди.  Юқори даражадаги тўп назорат қилиш қобилияти туфайли де Йонг Украинага қарши ўйинда энг кўп қўполлик ишлатилган футболчига айланди.

Қанот ҳимоячилари фаол равишда ҳужумга чиқиб турди. Бу яна такрорланадими?

Биринчи тур ўйинининг қаҳрамонларидан бири «ПСВ» ҳимоячиси Дензел Думфрис бўлди. Гап фақатгина унинг гол урганида ёки ўйин охирида энг яхши футболчига айланганида эмас. У бутун ўйин давомида қанотдан уюштирилган ҳужумларда фаол қатнашди. Чап қанотда эса Патрик ван Анҳолт рақиб жарима майдонига штурм қилди. Австрияга қарши баҳс алоҳида аҳамият касб этади. Ушбу учрашувда ҳам Франк де Бур ўз шогирдларидан фаолликни талаб қилиши, табиий.

Австрия

Марсель Забитцер жуда хавфли футболчи. Нидерландлар ундан эҳтиёт бўлиш керак

Давид Алаба бир неча йилдан бери Австрия терма жамоасининг асосий юлдузи ҳисобланади. Шимолий Македонияга қарши ўйинда Алаба яна бир бор ўзини кўрсатди. Лекин биринчи тур ўйинида Марсель Забитцер алоҳида ажралиб турди. Футболчи нидерландияликларга қарши баҳсда ҳам хавфли ўйин намойиш этиши аниқ.

Марко Арнаутович рақибини ҳақорат қилгани учун битта ўйинга четлатилди

Австрия терма жамоасининг ёрқин ҳужумчиси Марко Арнаутович Шимолий Македонияга қарши ўйинда рақибини ҳақорат қилгани учун бир ўйинга дисквалификация қилинди. Нидерландияга қарши учрашувда унинг ўрни билиниши аниқ. Франко Фодага унинг ўрнини ёпиш қийин бўлади.

Мураббийлар фикрлари: 

Австрия йилдан йилга кучайиб боряпти. Алабани барчамиз биламиз, Арнаутовични ҳам. Машҳур исмлар, муҳим футболчилар. Уларнинг кўпчилиги Германия Бундеслигасида тўп суради. Австрияга қарши ўйин осон кечмайди.Фрэнк де Бур, Нидерландия терма жамоаси бош мураббийи

Бир нарса аниқ: плей-оффга чиқишимиз учун очко олишимиз лозим. Шунинг учун ҳам майдонга тушамиз. Биринчи учрашувда ғалаба қозондик. Буни такрорлашга уринамиз.

Франко Фода, Австрия терма жамоаси бош мураббийи

Нидерландия: Мартен Стекеленбург; Дензел Думфрис, Стефан де Врей, Маттейс де Лигт, Дейли Блинд, Патрик ван Анҳолт; Мартен де Рон, Жоржиньо Вейналдум, Френки де Йонг; Ваут Вегорст, Мемфис Депай.

Австрия: Даниэль Баҳманн; Штефан Лайнер, Александар Драгович, Давид Алаба, Мартин Ҳинтереггер, Андреас Ульмер; Конрад Лаймер, Ксавер Шлагер, Марсель Забитцер; Саша Калайжич, Юлиан Баумгартлингер.

Жамоаларнинг охирги 5 ўйини статистикаси: 

Шевченко жамоаси аламини дебютантдан олмоқчи

Иккала жамоа ҳам Еврони мағлубият билан бошлади. Шимолий Македония Австрияга муаммолар туғдира олди. 78-дақиқагача 1:1 ҳисобини ушлаб турди. Украина эса 2 та тўп ўтказган бўлса ҳам ҳисобни тенглаштира олди. Аммо ўйин тугашига 11 дақиқа қолганда нидерландияликлар ғалаба голини урди. Ҳозирча иккала жамоа ҳам C гуруҳининг аутсайдерлари.

Жамоаларнинг охирги 5 ўйини статистикаси: 

Эриксен учун майдонга тушадиган Дания мусобақа фаворитларидан бирига қарши

Россия Финляндияни кичик ҳисобда енгди ва данияликлар B гуруҳида охирги ўринга тушиб қолди. Бельгияга ҳам мағлубиятга учраса данияликларнинг аҳволи жуда оғирлашиб қолади. Охирги турда Россияга қарши фақатгина ғалаба эмас, балки йирик ҳисобдаги ғалаба учун майдонга тушишига тўғри келади.

Бельгия учун эса вазифа осон: ғалаба қозониш ва гуруҳда биринчи ўринни эгаллаш керак. Агарда Бельгия мағлубиятга учраса, 3-тур олдидан B гуруҳида барча жамоаларда 3 очкодан мавжуд бўлади ва охирги тур жуда шиддатли тус олади.

Жамоаларнинг охирги 5 ўйини статистикаси: