«Ўзбекистон темир йўллари» томонидан «Навоий—Бухоро участкасида электрлаштирилган иккинчи юқори тезликдаги темир йўл қурилиши» лойиҳаси амалга оширилмоқда. Бу ҳақда компания матбуот хизмати хабар берди.
Қайд этилишича, бугунги кунда Тошкент—Самарқанд, Тошкент—Қарши ҳамда Тошкент—Бухоро йўналишида юқори тезликда ҳаракатланадиган «Афросиёб» поездларининг мунтазам қатнови амалга оширилади. Тошкент—Самарқанд—Мароқанд участкаси 2 йўналишли пўлат излардан ташкил топган бўлса, Навоий—Бухоро йўналиши бир изли темир йўл участкасидан иборат.
«Шу боис Ўзбекистон темир йўлчилари томонидан бир изли Навоий—Бухоро участкасида 2-йўналиш учун темир йўл бунёд этилиши натижасида тезюрар ҳамда юқори тезликда ҳаракатланадиган поездлар қатновининг қулай, хавфсиз ва ишончли бўлишига замин яратади. Энг муҳими, йўловчи поездлар қатнови вақтини янада қисқартиришга эришилади», — деб таъкидланмоқда компания хабарида.
Маълум қилинишича, Навоий—Бухоро участкасининг 2-йўналиши узунлиги 92,3 километрдан иборат бўлиб, «Ўзбекистон темир йўллари» акциядорлик жамиятининг ўз маблағлари ҳисобига барпо этилмоқда. Белгиланган лойиҳага кўра, ушбу участкада 3 та разезд, 1 та темир йўл ўтказгичини қуриш, 12 та темир-бетон кўприк, 49 та сунъий иншоот қурилиши ҳамда 3 та техник хизмат кўрсатиш биносини қуриш кўзда тутилган.
Айни пайтда лойиҳадаги 5 та темир-бетон кўпригини қуриш учун пойдевор тайёрлаш ишлари бажарилмоқда. «Қуйимозор—Разъезд-40» оралиғида эса 2 километр темир йўл излари ётқизилган. Бунинг учун қурилиш объектларида юздан ортиқ замонавий техникалардан фойдаланилмоқда.
«Таъкидлаш лозимки, ушбу лойиҳа ҳаётга татбиқ этилгач, эксплуатацион харажатларни камайтиришга эришилади. Ҳаракат тезлигини ошириш ҳисобига истеъмолчиларга хизмат кўрсатиш сифатини юксалтириш имконияти яратилади. Янги темир йўл участкасини қуриш орқали ўтказувчанлик қобилиятини кўтариш, янги иш жойларини ташкил қилиш, юк вагонлари айланмасининг ортиши ҳисобига ҳаракат таркибига бўлган талабни қисқартириш, лойиҳа ҳудуди экологик муҳитини яхшилаш, замонавий коммуникация тизими ва ресурс тежаш технологиялари ривожланишини таъминлашга муваффақ бўлинади», — дейилади хабарда.
Изоҳ (0)