Фарғона вилоятининг Фарғона туманида ФВВ ходимлари қудуқдан икки кишини олиб чиқди, деб хабар бермоқда вазирлик матбуот хизмати.
Маълум қилинишича, 17 июнь куни туманнинг «Дўстлик» МФЙ Нилуфар кўчасидаги уйларнинг бирида 50 метр чуқурликдаги қудуқни тозалаш мақсадида тушган фуқаро С.С.нинг бошига тупроқ тўла темир челак тушиб, воқеа жойида ҳалок бўлган.
Ушбу ҳолатга аниқлик киритилганда, уй эгаси С.С. қудуқни тозалаш ишларини олиб бораётганида темир челак арқони узилиб кетган. Бошида ҳимоя каскаси борлигига қарамасдан фуқаро оғир тан жароҳати билан ҳалок бўлган.
Ҳодисани кузатиб турган фуқаро Р.T. ёрдам бериш мақсадида чуқурликка тушган ва қайтиб чиқолмаган.
ФВБ ходимлари зудлик билан белгиланган манзилга етиб борган. Қутқарувчиларнинг тезкор ҳаракатлари натижасида қутқарув асбоб-анжомлари ёрдамида 50 метрлик қудуқдан ҳар икки фуқаро олиб чиқилган.
Мазкур ҳолат юзасидан дастлабки терговолди суриштирув ишлари олиб борилмоқда.
Аввалроқ Андижонда ФВВ ходимлари хандақ қазиётганда тупроқ босиб қолган фуқарони, Самарқандда ҳовлисидаги чуқурга тушиб кетган аёлни қутқаргани, Чимёнда баланд чўққига чиқиб, тушолмай қолганфуқаролар, шунингдек, Чирчиқ дарёси ўртасида қолиб кетган уч нафар вояга етмаган бола қутқарилгани ҳақида хабар берилган эди.
Тошкентдаги Бўрижар каналида икки нафар фуқарони қутқариб қолган ФВВ ходимларидан бири эса сувда чўкиб ҳалок бўлганди.
Изоҳ (0)