Uzbekistan Airways 18 июндан бошлаб ҳафтанинг жума кунлари амалга оширилаётган Тошкент—Деҳли—Тошкент йўналиши бўйича авиақатновларни бекор қилади.
Компания матбуот хизматининг хабар беришича, бу Ҳиндистонда юзага келган эпидемиологик вазият муносабати билан Ўзбекистонга коронавируснинг кириб келиши ва тарқалишининг олдини олиш бўйича чора-тадбирлар дастурини тайёрлаш бўйича республика махсус комиссиясининг қарорига мувофиқ амалга оширилади.
Uzbekistan Airways юзага келган ноқулайликлар учун узр сўраб, йўловчиларга бекор қилинган қатнов авиачиптаси учун пул маблағларини қайтариб олишни таклиф этган.
Эслатиб ўтамиз, Ҳиндистон фуқаро авиацияси бошқармаси томонидан аввал берилган рухсатноманинг бекор қилиниши сабаб Тошкент—Деҳли йўналиши бўйича 11 июнь куни соат 02:05 да учадиган HY 421 рейси қолдирилганди. Кейинроқ бекор қилинган ушбу рейс 12 июнь куни Тошкент вақти билан 3:00 да амалга оширилганди.