Бухоро вилояти Вобкент туманида ўзини Миллий гвардия ходими сифатида таништириб, фуқаролардан пул талаб қилган шахс ушланди. Бу ҳақда вилоят ҳокимлиги матбуот хизмати хабар берди.
Вобкент тумани «Ғарибшоҳ» маҳалласида яшовчи 21 ёшли М.С. бухоролик Б.М.га ўзини Миллий гвардия ходими сифатида таништириб, содир этган ҳуқуқбузарлиги юзасидан маъмурий баённома расмийлаштирмаслик эвазига ундан пул талаб қилган.
М.С. келишилган пулларни Бухоро шаҳар Абдулазим Сомий кўчасида жойлашган «Раҳматилло» савдо дўкони олдида олаётган вақтида ҳуқуқ-тартибот идоралари ходимлари томонидан жиноят устида қўлга олинган.
Мазкур ҳолат юзасидан Бухоро шаҳар ИИО ФМБ ҳузуридаги тергов бўлими томонидан М.С.га нисбатан Жиноят кодексининг 168-моддаси (фирибгарлик) 1-қисми билан жиноят иши қўзғатилиб, дастлабки тергов ҳаракатлари олиб борилмоқда.
Эслатиб ўтамиз, 2021 йилнинг май ўрталарида ҳам Бухорода сохта Миллий гвардия ходими қўлга олинган эди.
Изоҳ (0)