Тошкент шаҳрининг Чилонзор туманига янги ҳоким тайинланди. Бу ҳақда пойтахт ҳокимлиги матбуот хизмати хабар берди.
Маълум қилинишича 16 июнь куни Халқ депутатлари Чилонзор тумани кенгашининг навбатдан ташқари ўтказилган сессиясида Шавкат Мавлонов Чилонзор тумани ҳокими этиб тасдиқланган.
Шавкат Мавлонов 2019 йилдан буён Сирдарё вилояти Ички ишлар бошқармаси бошлиғи лавозимида ишлаб келган. Унинг ўрнини Самарқанд вилояти ИИБ бошлиғининг биринчи ўринбосари лавозимида ишлаб келган Шуҳрат Бўронов эгаллади.
Шавкат Мавлонов 1978 йилда Тошкент шаҳрида туғилган. 1999 йилда Ички ишлар вазирлиги академияси, 2012 йилда Ички ишлар вазирлиги академияси олий академик курсини тамомлаган.
Эслатиб ўтамиз, Шавкат Мирзиёев 2021 йилнинг январида Чилонзор туманининг аввалги ҳокими Сарвар Маҳаметовни лавозимидан озод этмоқчи бўлганди. Президент «ҳоким ёлвориб вазифаларни бажаришга ваъда бергани учун уни ишдан бўшатмаганини» айтганди. Сарвар Маҳаметов Президент томонидан белгиланган вазифаларни уч ой ичида бажаришга ваъда бериб, лавозимида қолганди.
Изоҳ (0)