Buxoro viloyati Vobkent tumanida o‘zini Milliy gvardiya xodimi sifatida tanishtirib, fuqarolardan pul talab qilgan shaxs ushlandi. Bu haqda viloyat hokimligi matbuot xizmati xabar berdi.
Vobkent tumani “G‘aribshoh” mahallasida yashovchi 21 yoshli M.S. buxorolik B.M.ga o‘zini Milliy gvardiya xodimi sifatida tanishtirib, sodir etgan huquqbuzarligi yuzasidan ma’muriy bayonnoma rasmiylashtirmaslik evaziga undan pul talab qilgan.
M.S. kelishilgan pullarni Buxoro shahar Abdulazim Somiy ko‘chasida joylashgan “Rahmatillo” savdo do‘koni oldida olayotgan vaqtida huquq-tartibot idoralari xodimlari tomonidan jinoyat ustida qo‘lga olingan.
Mazkur holat yuzasidan Buxoro shahar IIO FMB huzuridagi tergov bo‘limi tomonidan M.S.ga nisbatan Jinoyat kodeksining 168-moddasi (firibgarlik) 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Eslatib o‘tamiz, 2021-yilning may o‘rtalarida ham Buxoroda soxta Milliy gvardiya xodimi qo‘lga olingan edi.
Izoh (0)