Наманган вилояти Чортоқ шаҳар ҳудудидан оқиб ўтувчи Катта Наманган каналида чўкиб кетаётган аёл қутқарилди. Бу ҳақда ФВВ матбуот хизмати хабар берди.
Маълум қилинишича, 15 июнь куни соат 19:40 ларда мазкур ҳудудда хизмат олиб бораётган Чортоқ туман фавқулодда вазиятлар бўлими ёнғин-қутқарувчилари каналда оқиб кетаётган аёлни кўриб қолган. Шундан сўнг ФВБ ходимлари зудлик билан қутқарув ишларини амалга оширган.
Қутқарувчиларнинг олиб борган тезкор саъй-ҳаракатлари натижасида фуқаро хушсиз ҳолда қутқариб олиниб, биринчи тиббий ёрдам кўрсатилган. Ўзига келтирилган аёл туман тиббиёт бирлашмасига юборилган.
Қайд этилишича, айни пайтда қутқарилган аёлнинг аҳволи ўнгланган.
Аввалроқ Тошкентдаги Бўрижар каналида чўкиб кетаётган икки кишини қутқариб қолган ФВВ ходимларидан бири ҳалок бўлгани, Тошкентдаги Анҳор каналида чўкаётган қизни қутқарган эркакнинг ўзи сувга чўкиб кетгани, Нукусда ўзини каналга ташлаган 19 ёшли қиз қутқарилгани, Бухорода 9 ва 13 июнь кунлари мактаб ўқувчиси сувга чўкиб вафот этгани ҳақида хабар берилган эди.
Изоҳ (0)