«Бухоро йўллардан мунтазам фойдаланиш» корхонаси 65 миллиард сўмлик давлат харидларини нотўғри амалга оширган, дея хабар бермоқда Монополияга қарши курашиш қўмитаси матбуот хизмати.
Қайд этилишича, Монополияга қарши курашиш қўмитаси Бухоро вилояти ҳудудий бошқармаси «Бухоро йўллардан мунтазам фойдаланиш» унитар корхонаси томонидан 2019−2020 йиллар давомида товар (ишлар, хизматлар)лар харидини амалга оширишда «Давлат харидлари тўғрисида»ги ва «Рақобат тўғрисида»ги қонунлар талабларига риоя этилиши юзасидан ўрганиш ўтказган.
Ўрганиш «Бухоро йўллардан мунтазам фойдаланиш» томонидан тақдим қилинган ҳужжатлар асосида олиб борилган.
Маълум қилинишича, мазкур корхона томонидан 2019−2020 йиллар мобайнида ўз эҳтиёжи учун товарларни (қурилиш материаллари, эҳтиёт қисмлар, хўжалик моллари, дизель ёнилғиси, канцелярия моллари, мебель анжомлари, йўл белгилари ва бошқа маҳсулотлар) харид қилишда ва объектларда бошқа корхоналарга тегишли бўлган машина-механизм ва автотранспорт хизматларидан фойдаланишда вилоят ва республика ҳудудида фаолият олиб бораётган бошқа корхоналар билан икки томонлама тузилган шартномалар асосида олиб борилган.
Қўмита хабарига кўра, «Бухоро йўллардан мунтазам фойдаланиш» томонидан 2019 йилда 31 миллиард 413 миллион 366 минг 209 сўмлик ва 2020 йилда 33 миллиард 420 миллион 96 минг 221 сўмлик товарлар аукцион савдоларисиз ва хизматлар танлов (тендер) савдоларисиз, «Давлат харидлари тўғрисида»ги қонуннинг талабларига зид равишда, тўғридан-тўғри харид қилиш бўйича шартномалар имзоланиб харидлар амалга оширилган.
Мазкур ҳолатлар бўйича Монополияга қарши курашиш қўмитасининг Бухоро вилояти ҳудудий бошқармасининг давлат бошқаруви органлари, маҳаллий ҳокимияти органлари ва юридик шахслар бирлашмаларининг рақобатни чеклайдиган ҳужжатлари ҳамда ҳаракатларини, шунингдек, инсофсиз рақобатни тақиқлаш бўйича қонун ҳужжатлари бузилганлиги тўғрисидаги ишларни кўриб чиқиш бўйича махсус комиссияси Бухоро ЙМФУК томонидан қайд этилган қонунбузарликни бартараф этиш ва келгусида мазкур қонун бузилиши ҳолатларига йўл қўймаслик тўғрисида кўрсатма берди.
Бундан аввал Термизда қуриладиган 20 млн долларлик халқаро савдо марказининг тендерида ака-укага тегишли компаниялар қатнашгани маълум бўлгани ҳамда «Трест-12» 5 трлн сўмга яқин лойиҳаларни тендерсиз амалга оширгани ҳақида хабар қилинганди.
Изоҳ (0)