Ўзбекистон улгуржи электр энергияси бозорига ўтишни режалаштирмоқда. Бу ҳақда Энергетика вазирлиги хабар бермоқда.
Маълум қилинишича, Энергетика вазирлиги ҳузурида Schoenherr ва NERA Economic Consulting каби халқаро молия ташкилотлари билан ҳамкорликда фаолият олиб бораётган лойиҳа офиси ташкил этилди. Лойиҳа офиси экспертлари томонидан 2021–2025 йилларга мўлжалланган уч босқичдан иборат улгуржи рақобатбардош электр энергияси бозорига ўтиш кетма-кетлиги ишлаб чиқилди.
Биринчи босқичда электр энергияси корхоналарини эркинлаштириш ва электр энергиясини сотиш истагида бўлган хусусий корхоналар томонидан лицензия олиш кўзда тутилган. Бунда бозор муносабатларига асосланган ёндашув натижасида маҳсулот сифатини яхшилаш ва нархларнинг пасайишига эришилади.
Электр энергиясининг рақобатбардош улгуржи бозорига ўтиш иккинчи босқичида электр энергиясини тақсимлаш тизими оператори яратилади ва истеъмолчиларга электр энергиясини сотиш функциялари таъминотчиларга босқичма-босқич ўтказилади. Мазкур таъминотчилар лицензия асосида истеъмолчиларга электр энергиясини сотиш ҳуқуқига эга бўлади. Ушбу босқичда истеъмолчилар электр энергиясини онлайн савдо платформаси ёки исталган таъминотчи орқали сотиб олиши мумкин бўлади. Таъминотчилар ўртасида рақобат муҳити шаклланиши орқали электр энергияси таъминоти сифати ошишига эришилади.
Учинчи босқич – «Кун ичи (соатбай) савдолар» босқичи. Онлайн савдо платформасидаги эркин шартномалар ҳажмларига кўра, электр энергиясини режа асосида соатбай ишлаб чиқариш ва истеъмол қилишнинг ортиқча ёки етишмаётган ҳажмларини сотиш ва сотиб олиш операциялари амалга оширилади.
Мавзуга доир: Энергетика вазирлиги сўнгги кунларда электр таъминотидаги узилишларга нима сабаб бўлаётганини маълум қилди
Маълум қилинишича, миллий иқтисодиётнинг энергия самарадорлиги ривожланган мамлакатлар кўрсаткичларидан 2-2,5 баравар юқори.
2020 йилда ташкилий-техник тадбирларни амалга ошириш ҳисобига иқтисодиёт тармоқларида 1352,4 миллион куб метр табиий газ ва 917,5 миллион киловатт соат электр энергияси тежалиши таъминланди.
«Энергетика соҳасидаги давлат муносабатларининг кескин камайиши билан бозор муносабатларига ўтиш электр энергетикасини бошқариш тизимини такомиллаштиришга хизмат қилади. Натижада мамлакатнинг энергетика хавфсизлиги, республика энергетика таъминоти ишончлилиги ва барқарорлиги таъминланади. Асосийси – аҳолининг турмуш сифатини яхшилаш», – дейилади вазирлик маълумотида.
Изоҳ (0)