Тожикистонда сўнгги икки ҳафтадан буён ижтимоий тармоқ фойдаланувчилари мамлакатга коронавирус қайтгани ҳақида гапира бошлади, аммо Соғлиқни сақлаш вазирлиги эълон қилаётган кунлик маълумотлар мамлакатда коронавирус йўқлигини даъво қилмоқда, деб ёзади Asia-Plus.
Asia-Plus’нинг манбаларга таяниб хабар беришича, мамлакатнинг турли лабораторияларида коронавирусга чалиниш бўйича кунига бир нечта ҳолатлар аниқланмоқда.
«Бизнинг лабораторияда ҳар куни кўплаб одамлар коронавирусга тест топширади. Сўнгги икки ҳафта давомида суткасига маълум миқдордаги кишиларда инфекцияни аниқладик. Масалан, 8 июнь куни Душанбенинг ўзида 100 га яқин одамнинг тестида коронавирус топилди», — дейди «Диамед» хусусий лабораторияси ходими.
Яна бир хусусий лаборатория ҳам коронавирус юқтириш ҳолатлари аниқланаётганини тасдиқлади. Таъкидланишича, мамлакатдаги барча лабораториялар Соғлиқни сақлаш вазирлигига кунлик ҳисобот юборади ва COVID-19 аниқланган тақдирда вазирлик зудлик билан хабардор қилинади.
Аммо Соғлиқни сақлаш вазирлигининг Санитария эпидемиология станцияси (СЭС) ҳузуридаги давлат лабораториясида йил бошидан бери коронавирусга топширилган тест натижаси ижобий чиқмагани ҳақида хабар берилган. Улар бошқа лабораторияларда COVID-19 топилгани тўғрисидаги хабарларни миш-миш деб атади.
«Бир кунда 100 кишига коронавирус ташхиси қўйилгани ҳақидаги миш-мишлар ҳақиқатга тўғри келмайди. Агар шундай бўлганида, барча касалхоналар тўлиб кетган бўларди» — дейилади СЭС лабораториясида.
Душанбедаги коронавирусга шубҳа қилинган беморларнинг асосий қисми 1-сонли шаҳар соғлиқни сақлаш марказига ётқизилади. Asia-Plus манбаси хабарига кўра, сўнгги кунларда деярли ҳар куни 3 киши коронавирус билан реанимация бўлимига ётқизилмоқда.
Asia-Plus манбаларига кўра, Хўжанд шаҳрида ҳам коронавирусга шубҳа қилинган беморлар бор, аммо шаҳар юқумли касалликлар шифохонаси буни рад этмоқда.
«Айни пайтда минтақада эпидемиологик вазият тинч. Ҳеч бир бемор коронавирус аломатлари билан касалхонага ётқизилмаган», — деди Хўжанд юқумли касалликлар шифохонаси бош шифокори Рустам Бўриев.
11 июнь куни Тожикистон Соғлиқни сақлаш вазирлиги мамлакатда коронавирус мавжудлигини қатъиян рад этди ва бу ҳақидаги хабарларни фақатгина миш-миш деб атади.
«Бу хабарлар ҳақиқатга тўғри келмайди. Акс ҳолда бош штаб уларни кўриб чиққан бўларди. Шунингдек, коронавирус аниқланган тақдирда, бу ҳақда жамоатчилик расмий равишда хабардор қилинади. Баъзида шунга ўхшаш аломатлар — иситма, йўтал ёки пневмония ҳолатлари учраб туради, аммо бирорта ҳам COVID-19 тестига ижобий натижа йўқ» — деди Соғлиқни сақлаш вазирлиги матбуот котиби Эмомали Мирзоев.
Унинг сўзларига кўра, мамлакатдаги эпидемиологик вазият Соғлиқни сақлаш вазирининг шахсий назоратида, у кунига икки марта барча врачлар ва бошқа масъул шахслар билан видеоконференция ўтказади. Мамлакат бўйлаб хонадонларни айланиб чиқиш давом этмоқда ва касаллик аломатлари бор одамлар назорат остига олинмоқда.
«Агар гумонланувчининг иситмаси ва қуруқ йўтали бўлса, ундан тестлар олинади. Кўпгина ҳолларда бу мавсумий касаллик бўлиб чиқади, унинг коронавирусга ҳеч қандай алоқаси йўқ», — дея қўшимча қилди Мирзоев.
Унинг таъкидлашича, кўпинча иситма ва пневмония ҳолатлари болалар ва ўсмирларда кузатилади ва бу совуқ ичимлик ичиш ёки совуқ сувда чўмилиш билан боғлиқ.
Вакилнинг сўзларига кўра, расмийлар коронавирусни мамлакатга қайта киритилишининг олдини олиш учун барча чораларни кўрмоқда. Тожикистонга келаётганларнинг барчаси коронавирус тести салбий бўлган тақдирдагина мамлакатга киритилади. Шунингдек, оғир вазиятга тушиб қолган бир қатор давлатлардан, масалан, Туркия ва Ҳиндистондан келувчилар махсус назоратга олинади. Улар карантинга риоя қилиб, COVID-19’га икки марта тест топширади. Натижалар салбий чиққанидан кейингина чекловлардан озод қилинади.
Изоҳ (0)