Москвада коронавирусга чалинганлар кўпайиб кетгани сабабли янги чекловлар киритилди. COVID-беморлар учун касалхоналар тайёрланмоқда

Сўнгги бир кеча-кундузда Москвада COVID-19’га чалиниш бўйича 6701 та янги ҳолат қайд этилди. Бу ҳақда шаҳарнинг коронавирусга қарши кураш тезкор штабига таяниб, Meduza хабар берди.

Бу 2020 йил охиридан буён кунлик касалланишнинг энг юқори даражаси, сўнгги марта бундай кўрсаткич 26 декабрь куни қайд этилиб, ўшанда 7480 кишида инфекция аниқланган эди.

Ўтган кун давомида Россияда аниқланган COVID-19’га чалиниш ҳолатларининг деярли ярми Москва ҳиссасига тўғри келди. Ҳаммаси бўлиб, мамлакатда  бир суткада 13510 кишида коронавирус қайд этилди. Россияда ўтган кун давомида COVID-19 ташхиси билан 399 киши, хусусан, Москвада 67 киши вафот этди.

Москва мэри Сергей Собянин коронавирус билан касалланиш ортгани сабабли 2021 йил 15 июндан 19 июнгача иш ҳақи сақланиб қолган ҳолда, шаҳарда дам олиш кунлари деб эълон қилди.

«Москвада дам олиш кунлари 9 кун давом этади — 12 июндан 20 июнгача», — дейилади Собянин веб-сайтида.

Ишламайдиган кунлар шаҳар инфратузилмаси учун муҳим бўлган корхоналар, шунингдек, ҳарбий саноат комплекси, «Росатом», «Роскосмос» ва бошқа баъзи стратегик тармоқлардан ташқари барча мулк шаклларидаги корхоналарга тааллуқлидир.

20 июнга қадар Москва паркларида аттракционлар, ўйин ва спорт майдончалари, ижарага бериш пунктлари, шийпонлар ҳамда бошқа дам олиш ва кўнгилочар муассасалар ёпиқ бўлади. Савдо марказларида овқатланиш бурчаклари ва болалар ўйин хоналари ишламайди.

Умумий овқатланиш корхоналари ва тунги клубларда соат 23:00 дан 6:00 гача ташриф буюрувчиларга хизмат кўрсатиш тақиқланади (олиб кетиш хизмати бундан мустасно). Тунги клубларда ва барларда концертларга рухсат берилмайди.

Шунингдек, коронавирусга қарши кураш бўйича Москва тезкор штабининг Telegram каналида айтилишича, 20 июнга қадар шахсий хизматлар кўрсатиш тақиқланган.

Сергей Собянин маълум қилишича, Москвада коронавирус инфекциясининг тарқалиши билан боғлиқ вазиятнинг мураккаблашиши сабабли шаҳар касалхоналарида минглаб койкалар коронавирус беморларига мослаштирилмоқда.

«Йирик оқимдаги беморларга тиббий ёрдам кўрсатиш учун биз шаҳар шифохоналарида минглаб ётоқларни қайта профиллаштиришга мажбур бўлмоқдамиз», — деб ёзади Собянин ўз веб-сайтида.