КХДР етакчиси Ким Чен Ин Корея меҳнат партиясининг Марказий қўмитаси йиғилишида иштирок этди ва мазкур тадбирда Корея яриморолидаги вазият туфайли мамлакатнинг мудофаа салоҳиятини янада яхшилаш масалалари муҳокама этилди. Бу ҳақда Корея марказий телеграф агентлигига таяниб, «ТАСС» хабар қилган.
«Кенгайтирилган таркибда ўтказилган мажлисда қуролли кучларнинг ҳарбий салоҳиятини яхшилаш ва миллий мудофаа умумий ишида Корея яриморолидаги вазиятга ҳамоҳанг равишда янгича бурилишлар қилиш бўйича муҳим вазифалар белгилаб олинди», — дейилади агентлик хабарида.
Агентлик айнан қандай муҳим вазифалар белгилаб олинганлигига аниқлик киритмаган.
Аввалроқ Корея меҳнат компартияси марказий қўмитасининг сиёсий бюроси июнь ойида йил бошида 2021 йил учун белгилаб олинган вазифалар ижроси таҳлили ва муҳокамасига бағишланган ялпи мажлис ўтказиши хабар қилинган.
Шунингдек, агентлик Ким Чен Иннинг Россия президенти Владимир Путинга Россия куни муносабати билан табрик йўллаганини маълум қилган. КХДР етакчиси ўз мактубида икки томонлама муносабатларни ривожлантириш лозимлигини қайд этган.
«Бу узоқ йиллик тарих ва анъаналарга эга икки мамлакат ва халқлар ўртасидаги дўстлик алоқаларини мустаҳкамлашга бўлган интилишдир», — дейилган мактубда.
Ким Чен Ин Пхенян ҳамда Москва ўртасидаги муносабатлар Путин билан Владивостокда ўтган биринчи учрашувдан кейин янги босқичга кўтарилгани ва бу барча соҳалардаги самарали ҳамкорликка хизмат қилишини қайд этган.
«Фурсатдан фойдаланиб, Россия президентига масъулиятли вазифасида омад, мустаҳкам соғлик, рус халқига тинчлик ва фаровонлик тилайман», — дейилади Ким Чен Иннинг мактубида.
Аввал 3 июнда Шимолий Корея Меҳнат партияси (ШКМП)да янги — КХДР раисининг биринчи ўринбосари, биринчи котиб лавозими жорий қилиниши ва мазкур лавозим Ким Чен Иннинг синглиси Ким Ё Чжонга топширилиши мумкинлиги хабар қилинган. Кейинчалик Ким Чен Ин қарийб бир ойдан буён биринчи марта жамоатчилик олдида кўриниш берган, унинг кескин ва катта миқдорда вазн ташлагани КХДР етакчисининг соғлиғи ёмонлашгани ҳақидаги миш-мишларга сабаб бўлганди.
Изоҳ (0)