Самарқанд вилояти Каттақўрғон туманида ЙПХ инспекторлари Давлат солиқ инспекцияси ходимини ўлдириб қўйгани ҳақида хабарлар тарқалганди. ИИВ ҳолат юзасидан прокуратура органлари томонидан суриштирув ҳаракатлари олиб борилаётганини маълум қилганди. Вазирлик ҳолат юзасидан ёлғон ёки нохолис ахборот тарқатганлар жавобгарликка тортилиши мумкинлигини ҳам эслатиб ўтди.
Вазирлик айрим ижтимоий тармоқларда содир бўлган мазкур ҳолатга ўз муносабатини қуйидаги асослар билан билдирган:
Конституциянинг 26-моддасида «Жиноят содир этганликда айбланаётган ҳар бир шахснинг иши судда қонуний тартибда, ошкора кўриб чиқилиб, унинг айби аниқланмагунча у айбдор ҳисобланмаслиги белгиланган.
Жиноят процессуал кодексининг 23-моддаси (айбсизлик презумпсияси)да «гумон қилинувчи, айбланувчи ёки судланувчи унинг жиноят содир этишда айбдорлиги қонунда назарда тутилган тартибда исботлангунга ва қонуний кучга кирган суд ҳукми билан аниқлангунга қадар айбсиз ҳисобланиши» қайд этилиб, мавжуд қонунчилик талабларига амал қилинмаган ҳолда муносабат билдириши натижасида оммада салбий ижтимоий фикр шаклланишига сабаб бўлиши мумкин.
Бундан ташқари, журналистика фаолияти билан шуғулланадиган ҳар бир шахс бевосита «Ахборот олиш кафолатлари ва эркинлиги тўғрисида»ги қонуннинг 11-моддаси (ахборотнинг тўғрилиги учун жавобгарлик)да қайд этилган, яъни оммавий ахборот воситалари эълон қилинаётган ахборотнинг тўғрилигини текшириб кўришлари шартлиги ва улар ахборот берувчи билан биргаликда унинг тўғрилиги учун қонун ҳужжатларида белгиланган тартибда жавобгар бўлишлари ҳамда «Оммавий ахборот воситалари тўғрисида»ги қонуннинг 5-моддаси (оммавий ахборот воситаларининг эркинлиги)да оммавий ахборот воситалари қонун ҳужжатларига мувофиқ ахборотни излаш, олиш, тадқиқ этиш, тарқатиш, ундан фойдаланиш, уни сақлаш ҳуқуқига эгалиги ҳамда тарқатилаётган ахборотнинг холислиги ва ишончлилиги учун белгиланган тартибда жавобгар бўлиши белгиланганлиги ҳақидаги нормалардан бевосита хабардор бўлишлари лозим.
Шу билан бирга, шахснинг қадр-қиммати камситилишига ёки унинг обрўсизлантирилишига олиб келадиган ёлғон ёки нохолис ахборотни тарқатиш, шу жумладан, оммавий ахборот воситаларида, телекоммуникация тармоқларида ёки интернет тармоғида тарқатиш қонунчиликка асосан жавобгарликка тортилиши учун асос бўлиши мумкинлигини ҳам эслатиб ўтган.
ИИВ матбуот хизматининг билдиришича, ҳолат юзасидан прокуратура органлари томонидан жиноят иши қўзғатилган ва тергов ҳаракатлари олиб борилмоқда. Вазирлик ҳолатни бодикамерада олинган видеосини ҳам эълон қилганди.
Аввалроқ Ўзбекистон Олий Мажлиси Сенатининг Мудофаа ва хавфсизлик масалалари қўмитаси мазкур ҳолат бўйича ўрганиш натижалари кенг оммага эълон қилинишини, ўз навбатида қўмита қонун бузилиш ҳолатининг ҳар қандай кўринишига муросасиз эканлигини билдирганди.
Изоҳ (0)