АҚШ президенти Жо Байден Беларусга қарши 2006 йилда киритилган санкциялар муддатини бир йилга узайтирди. Бу ҳақда Оқ уй сайтида маълум қилинди.
Хабарга кўра, «Беларусь ҳукумати ва бошқа вакилларнинг ҳаракатлари АҚШ миллий хавфсизлиги ҳамда ташқи сиёсатига фавқулодда ва ўта жиддий таҳдид солишда давом этмоқда».
Александр Лукашенко 2006 йилги президентлик сайловларида ғалаба қозонганидан сўнг кичик Жорж Буш Беларусга санкциялар киритган эди. АҚШ ва Европа Иттифоқи сайловларни демократия талабларига жавоб бермайди, деб атаган. Ўшанда АҚШ фуқаролари ва компаниялари учун «қора рўйхат»га киритилган шахсларга маблағ бериш, товар сотиш ёки хизмат кўрсатиш тақиқлаб қўйилган. «Қора рўйхат»га, хусусан, Лукашенконинг ўзи, «Белнефтехим» ва унинг Америкадаги ваколатхонаси, «Белшина», «Гродно Азот», «Гродно Химволокно», «Лакокраска», «Нафтан», «Полоцк-Стекловолокно» каби компаниялар ва Беларусь нефть савдо уйи киритилган.
2015 йилда АҚШ ва Беларусь ўртасидаги муносабатлар Украинанинг жануби-шарқидаги вазиятни ҳал қилишда Минскнинг ёрдами фонида яхшилана бошлаган. Кейин Вашингтон Америка компанияларига рўйхатдаги корхоналар билан операцияларни амалга оширишга рухсат берган.
2021 йилнинг 3 июнь куни Вашингтон рўйхатдаги компанияларга нисбатан санкцияларни қайта жорий қилди. Давлат департаментининг маълумот беришича, Беларусь давлат корхоналарига қарши санкцияларнинг қайта тикланиши ҳукумат томонидан «инсон ҳуқуқларини очиқдан очиқ эътиборсиз қолдириш» натижаси ҳисобланади.
Бундан ташқари, АҚШ Европа Иттифоқи ва бошқа иттифоқчилар билан ҳамкорликда Беларусь ҳукумати вакилларига қарши мақсадли санкцияларнинг яна бир рўйхатини ишлаб чиқмоқда, деб хабар қилган эди Оқ уй вакили Жен Псаки май ойининг охирида. Санкциялар Ryanair авиакомпаниясининг Минскка қўндирилиши ва Беларусь ҳукумати томонидан мухолифатчи Nexta Telegram каналининг собиқ бош муҳаррири Роман Протасевичнинг ҳибсга олиниши билан боғлиқ вазият туфайли режалаштирилмоқда.
Изоҳ (0)