Сальвадор биткоинни доллар билан бир қаторда қонуний тўлов воситасига айлантирувчи қонун лойиҳасини тайёрламоқда. Бу билан Сальвадор криптавалютани қонунийлаштирган биринчи суверен давлат бўлади, деб ёзмоқда Inc.
Хабарга кўра, давлат раҳбари Найиб Букеле мамлакатнинг биткоин технологиясидан фойдаланган ҳолда замонавий молиявий инфратузилмани яратиш бўйича Strike билан ҳамкорлик қилишини эълон қилди.
«Кейинги ҳафта конгрессга биткоинни қонуний тўлов воситасига айлантирувчи қонун лойиҳасини юбораман», — деди Найиб Букеле Майамида бўлиб ўтган Bitcoin 2021 конференциясида.
Сальвадорда, асосан, нақд пулдан фойдаланилади: тахминан, 70 фоиз аҳоли банк ҳисоби ёки карталарига эга эмас. Пул ўтказмалари ялпи ички маҳсулотнинг (ЯИМ) 20 фоизидан кўпроғини ташкил қилади.
Эслатиб ўтамиз, электромобиль ишлаб чиқарувчи Tesla компанияси 24 март куни ўз маҳсулотлари учун биткоинлар билан тўлаш имкониятини қўшди. Май ойи ўртасида компания биткоинларни тўлов сифатида қабул қилишни тўхтатди. Бунга криптовалюта олиш учун қазиб олинаётган ёнилғилар миқдорининг ошиб бораётгани сабаб бўлгани айтилмоқда.
Изоҳ (0)