Дунёдаги 20 га яқин давлатнинг ҳуқуқ-тартибот органлари ходимлари жиноятчиликда гумон қилинган 800 дан ортиқ одамни ҳибсга олиш бўйича операция ўтказди. Бу ҳақда Europol сайтида келтирилган маълумотларга таяниб «РБК» хабар берди.
Хабарда айтилишича, Trojan Shield деб номланган халқаро операция жиноий фаолиятга қарши кураш бўйича энг катта ва энг қийин операциялардан бири бўлди. Унда АҚШнинг Гиёҳванд моддаларга қарши кураш бошқармаси ҳамда Федерал қидирув бюроси (ФҚБ), Нидерландия миллий полицияси, Швеция полиция департаменти, Австралия Федерал полицияси ва бошқа муассасалар иштирок этди.
Europol баёнотига кўра, сўнгги кунларда хавфсизлик кучлари 16 мамлакатда 700 дан ортиқ тинтув ўтказди ва юзлаб одамларни ҳибсга олди. Қўлга олинган шахслардан 8 тоннадан ортиқ кокаин, 22 тонна каннабис ва каннабис қатрони, 2 тонна синтетик гиёҳванд моддалар (амфетамин ва метамфетамин) ва 6 тонна синтетик гиёҳванд моддалар прекурсори топилган. Бундан ташқари, ҳуқуқ-тартибот идоралари томонидан 250 та қурол, 55 та қимматбаҳо автомобиль ва 48 миллион доллардан ортиқ қийматдаги турли хил валюта ва криптовалюталар мусодара қилинди.
Операция 2019 йилдан бошлаб ишлаб чиқилган. Унинг доирасида ФҚБ ходимлари АNOM шифрланган хабарларини алмашиш учун платформа яратган. BBC ёзишича, датур ўрнатилган қурилмалар гумонланувчиларга яширинча тарқатилган, бу полицияга уларнинг наркотик моддалар контрабандаси, «пул ювиш» ва қотиллик режалари ҳақидаги суҳбатларини кузатиб бориш имконини беради. Ҳаммаси бўлиб 12 мингга яқин мослама тайёрланган бўлиб, улар 100 дан ортиқ мамлакатларда жиноятчилар томонидан ишлатилган. Дастур ёрдамида ҳуқуқ-тартибот идоралари 27 миллион хабарни ўрганган.
Қайд этилишича, операция мобайнида Австралияда 224 киши ҳибсга олинган ва олтита яширин гиёҳвандлик лабораторияси ёпилган, ўқотар қурол ва ўн миллионлаб доллар нақд пул мусодара қилинган. Нидерландияда 35 нафар гумонланувчи ҳибсга олинган.
Deutsche Welle хабарига кўра, Франкфурт прокуратураси бутун Германия бўйлаб 70 дан ортиқ одам ҳибсга олингани ҳақида маълум қилди. Ҳуқуқ-тартибот идоралари 150 жойда тинтув ўтказган, текширув ҳаракатларининг асосий қисми мамлакатнинг марказий қисмидаги Гессен федерал штатида бўлиб ўтган.
Изоҳ (0)