Туркия ҳукумати Мармар денгизини шилимшиқ моддалардан тозалаш бўйича кенг кўламли операцияни бошлади. Ушбу моддалар сув ҳавзасининг оқова сувлар билан ислофланиши туфайли ҳосил бўлган.
«Бугун биз балиқларга, барча тирик мавжудотларга ва бутун экологияга таҳдид солувчи шилимшиқ моддалардан денгизни тозалаш бўйича Туркия тарихидаги энг йирик операцияни бошлаймиз», — деди атроф-муҳитни муҳофаза қилиш вазири Мурат Курум.
Унинг сўзларига кўра, 2021 йил охирига қадар Мармар денгизи муҳофазадаги ҳудуд деб эълон қилинади. Тегишли таклиф Туркия президентига имзолаш учун тақдим этилади.
Тозалаш ишларига давлат хизматчилари ҳам жалб қилинган. Насослар ва бошқа техник воситалар ёрдамида йиғилган шилимшиқ моддалар утилизация учун юборилади. Тозалаш билан ғаввослар шуғулланади, шунингдек, сузувчи тўр тўсиқлардан ҳам фойдаланилади.
Аввалроқ туркиялик олимлар денгиз ўтлари шилимшиғи Мармар денгизида кенг тарқалгани ҳақида хабар берган эди: у нафақат денгиз юзасида, балки сув тубида ҳам тарқалган гелга ўхшаш модда.
«Биз илгари бундай ҳодисани бу қадар катта миқёсда кўрмаган эдик», — деди Туркиянинг Яқин Шарқ техника университети директори Барш Салиҳўғлу. Унинг сўзларига кўра, денгиз сувидаги кислород даражаси жиддий тарзда пасайган, бу эса тезкор чораларни талаб этади.
Изоҳ (0)