Ўзбекистонда 2021/2022-ўқув йилидан бошлаб ОТМга киришда юқори балл тўплаган ёшлар учун Президент гранти (200 та) жорий этилади ҳамда ОТМда 2 ва ундан ортиқ фарзанди шартнома асосида ўқиётган оилаларга таълим кредити берилади. Бу ҳақда Адлия вазирлиги хабар қилди.

Бундан ташқари ушбу ўқув йилидан бошлаб:

  • хорижий тилларни ўқитишга ихтисослаштирилган ОТМларига қабул параметрлари икки бараварга, давлат гранти асосида қабул кўрсаткичлари эса уч бараварга оширилади;
  • ОТМга киришда юқори балл тўплаган ёшлар учун Президент гранти (200 та) жорий этилади;
  • ОТМда 2 ва ундан ортиқ фарзанди шартнома асосида ўқиётган оилаларга таълим кредити берилади;
  • давлат грантлари 25 фоизга, эҳтиёжманд оилалар фарзанди бўлган хотин-қизлар учун давлат гранти 2 бараварга оширилади;
  • хусусий ОТМда ҳам давлат гранти берилади;
  • клиник ординатура мутахассисликлари бўйича қабул квотаси икки бараварга оширилади.

Шунингдек, базавий тўлов-контракт асосида давлат ОТМга қабул қилинган, ота-онаси ёки уларнинг биридан айрилган муҳтож қизлар, боқувчиси йўқ ёлғиз аёлларни Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳамда давлат ОТМ ҳисобидан ўқитиш тартиби жорий этилади.

Бундан ташқари, республикадаги барча давлат ОТМларига ўқишга қабул қилишда бошқа тиллар (испан, итальян, тожик, қозоқ, туркман, қирғиз тиллари ва бошқалар)дан топшириладиган кўп балли тизим бўйича имтиҳонлар ўрнига тест синовлари ўтказилади.