Oliy ta’lim vaziri: “Ming kishilik oshlarimiz bor ekan, OTMlarga imtihonsiz qabul tizimini joriy qilib bo‘lmaydi”

“Toshkent 5 tashabbus harakati” ikkinchi kunida ham hukumat vakillari bilan uchrashuvlar o‘tkazildi. Oliy va o‘rta maxsus ta’lim vaziri Abduqodir Toshqulovning yoshlar bilan ochiq muloqoti ko‘pchilikning diqqat markazida turdi.

Tadbir davomida ishtirokchilardan biri OTMlarga imtihonsiz qabul tizimini joriy qilish taklifini ilgari surib, xorijdagi aksariyat oliygohlarda talabalar o‘quv jarayonida saralab olinishini misol qilib keltirdi. Vazir bunga atroflicha tushuntirish berdi.

Ma’lumki, xorijdagi OTMlarda qabul oson, bitirish qiyin. Bizda esa ko‘pchilikda buning aksi – o‘qishga kirish qiyin, bitirish osondek tuyuladi. Xorijdagidek tartib amal qilishini men ham xohlayman. Lekin bitta masala: bizda bu o‘zbekchilik-da, 300 dan 1000 kishigacha oshlarimiz bor ekan, talabani o‘qishdan chetlatib bo‘lmaydi, menimcha. Gapimning ma’nosini tushundingiz deb o‘ylayman. Lekin bu sizning taklifingiz bo‘lmaydi degani emas. Biz shunga qarab intilyapmiz. Qaysi OTMda shaffof muhit bo‘lsa, guruhda yaxshi o‘qigan talaba keyingi kursga o‘tib, o‘qimagani kursdan qolsa, ana o‘sha yerda buni joriy qilsa bo‘ladi.

Men vazir sifatida hozir yana bir taklif bilan chiqyapman. Talabalarni o‘qishga qabul qilishda DTM imtihon qiladi, to‘g‘rimi?! Mening taklifim, bitirayotganida ham davlat attestatsiyalarini DTM o‘tkazsin. Bu o‘qituvchini ham ishlashga majbur qiladi. Lekin hozircha bu bizga to‘g‘ri kelmaydi. Sababi boya aytganimdek, “bizda oshlarimiz bor” degan jumla zamirida juda katta ma’no bor.

Abduqodir Toshqulov, oliy ta’lim vaziri

Eslatib o‘tamiz, ushbu uchrashuvda, shuningdek, vazir 96 ming o‘rinli talabalar yotoqxonasini qurish uchun 4,4 trillion so‘m mablag‘ ajratilishini bildirgan. Bundan avval esa Toshqulov OTM yotoqxonasida bir talaba bilan tonggacha suhbat qurib, undan butun sir-asrorni so‘rab olgani, talabalar o‘limi bilan bog‘liq voqealardan so‘ng mahallalarda talababay yurishlar boshlanganini, Yunusobodda murdasi topilgan besh talabaning yaqinlariga moddiy yordam ko‘rsatilganini aytgan xabarlar ham chiqqan edi.