Ўзбекистон Президенти Шавкат Мирзиёев 7 июнь куни «Ногиронлар ҳуқуқлари тўғрисидаги конвенцияни (Нью-Йорк, 2006 йил 13 декабрь) ратификация қилиш тўғрисида»ги қонунни имзолади, деб хабар беради «Халқ сўзи online». Ҳужжат Олий Мажлис Қонунчилик палатаси томонидан 18 майда қабул қилинган ва 29 майда Сенат томонидан маъқулланган эди.
Конвенция 12-моддага («Қонун олдида тенглик») қуйидагича қўшимча тушунтириш ва баёнот билан қабул қилинган:
- «Ўзбекистон Республикаси ногиронлиги бўлган шахс ҳаётнинг барча жабҳаларида бошқалар билан тенг равишда ҳуқуқий лаёқатга эга эканлигини тан олади.
- Ўзбекистон Республикаси конвенция ногиронлиги бўлган шахсларнинг қарорларни қабул қилиш механизмларини қўллаб-қувватлаш ва ўзгартириш киритишларни таъминлаш учун тегишли чораларни кўришга имкон беришини, жумладан, тегишли шароитларда ва қонунчиликка мувофиқ ногиронлиги бўлган шахсларнинг ҳуқуқий лаёқатини чеклаш кераклигини тушунишини маълум қилади.
- Ўзбекистон Республикаси ногиронлар учун қарорларини қабул қилиш механизмларидан фойдаланишда давом этиш ҳуқуқини ўзида сақлаб қолади».
Маълумот учун, Ўзбекистон Ногиронлар ҳуқуқлари тўғрисидаги конвенцияни 2009 йилнинг 27 февралида имзолаган, бироқ ҳалигача уни ратификация қилмаган эди. Ногиронларнинг нодавлат ташкилотлари вакиллари узоқ вақт давомида бир неча марта ушбу ҳужжатни ратификация қилишнинг зарурлиги тўғрисида эслатишди.
2017 йил охирида Президент Шавкат Мирзиёев ногиронлиги бўлган шахсларни давлат томонидан қўллаб-қувватланиши тизимини тубдан такомиллаштириш тўғрисидаги фармонни имзолади. Ҳужжатда БМТнинг Ногиронлар ҳуқуқлари тўғрисидаги конвенциясини ратификация қилишга тайёргарлик кўриш бўйича амалий чораларни кўриш топширилди. Жорий йилнинг январида Ўзбекистонда «Ногиронлиги бўлган шахсларнинг ҳуқуқлари тўғрисида"ги янги қонун кучга кирди.
Изоҳ (0)