Чироқчида ҳоким ваъдасини бажармагани учун «Афросиёб» поезд йўли тўсиб қўйилди

Қашқадарё вилояти Чироқчи туманида «Афросиёб» поезд йўли аҳоли томонидан тўсиб қўйилди. Ҳолат юзасидан «Ўзбекистон темир йўллари» маълумот берди.

Маълум қилинишича, 7 июнь куни эрталаб соат 09:00 дан 10:20 ларга қадар «Қарши минтақавий темир йўл узели» унитар корхонасига қарашли Айратом темир йўл бекати ҳудудида Чироқчи туман Айратом қишлоғи фуқаролари темир йўл устига йиғилганлиги акс этган видео ижтимоий тармоқларда тарқалди.

Аҳолининг темир йўл бекатига йиғилишининг асосий сабаби қишлоқ аҳли туман ҳокими Хуррам Жўраевдан қишлоқда электр энергияси таъминоти қониқарсиз бўлганлиги учун қишлоқни электр энергияси билан таъминлаш, яъни қишлоққа келадиган электр энергиясини бошқа кучлироқ трансформаторга улашни сўраган. 7 июнь куни соат 9:00 ларда туман ҳокимининг қишлоққа ташрифи кутилган.

Туман ҳокими белгиланган вақтда Айратом қишлоғига электр энергияси масаласини ҳал қилиш учун келмаганлиги сабабли аҳоли темир йўл атрофига йиғилган.

Тошкент–Қарши йўналиши бўйича ҳаракатланувчи «Афросиёб» тезюрар поезди график бўйича ушбу бекатдан соат 10:48 да ўтиб кетиши белгиланган.

Поезд келишидан, тахминан, 28 дақиқа олдин Чироқчи туман ҳокими Хуррам Жўраев ўзи келиб, темир йўл атрофида йиғилган қишлоқ аҳолисини Айратом қишлоғи маҳалла фуқаролар йиғинига олиб кетади ва уларнинг муаммолари ўрганиб, тушунтириш ишлари олиб борилади.

«Афросиёб» тезюрар поезди график бўйича ушбу бекатдан соат 10:48 да ўтиб кетган. Поезд тўхтамаган ва ҳеч қандай зарар ёки талафот бўлмаган.

Бундан аввал Нукусда бир гуруҳ аёллар йўлни тўсиб қўйгани ҳамда Сирдарёда иш ҳақидан норози кластер ишчилари велосипедларда автомобиль йўлини тўсиб қўйгани ҳақида хабар берилганди.