Шимолий Корея етакчиси Ким Чен Ин 4 июнь, жума куни КХДР Меҳнат партияси Марказий қўмитаси Сиёсий бюросининг 8-чақириқ, биринчи йиғилишида иштирок этди, бу унинг 7 майдан буён биринчи оммавий чиқишидир. Бу ҳақда Кореянинг Марказий телеграф агентлигига таяниб «Korrespondent.net» хабар берди.
Фото: «РИА Новости»
Хабарга кўра, йиғилишда Марказий қўмита Сиёсий бюроси президиуми аъзолари, партиянинг Марказий қўмита Сиёсий бюроси аъзолари ва аъзолигига номзодлар иштирок этган.
Йиғилганлар партия Марказий қўмитасининг пленумини муҳокама қилган. Ким Чен Ин амалдаги вазиятни таҳлил қилиб, биринчи ярим йилликнинг «аниқ» натижаларини сарҳисоб қилиш ва ривожланиш йўналишларини аниқлаштириш учун Марказий қўмита пленумини чақириш кераклигини таъкидлаган. Пленумнинг мавзуси, хусусан, партия Марказий қўмитаси бўлимлари кадрларини қайта тузишдир. Йиғилишда июнь ойининг биринчи ўн кунлигида пленум ўтказишга қарор қилинган.
«Учрашув давомида Ким Чен Ин кўплаб муаммолар ва чекловларга дуч келаётган давлат лойиҳаларининг ривожланишини юқори баҳолади», — дейилади телеграф хабарида.
Шунингдек, республика раҳбари йиғилиш қатнашчиларини партиянинг етакчилик ролини оширишга, унинг иқтисодиётни барқарорлаштириш ва такомиллаштириш йўлидаги «қатъиятли кураши»ни рағбатлантириш чораларини кўришга чақирган.
Охирги марта Ким Чен Ин 7 май куни Пхеньянда ўтказилган концертда қатнашган эди. Шимолий Корея раҳбарининг шунча вақт жамоат олдига чиқмаганига оид эҳтимолий сабаблар айтилмаган. Бу унинг 2021 йилда энг узоқ муддат жамоат олдида кўриниш бермагани ҳисобланади.
Бу вақт мобайнида 28 май куни у Сурия президенти Башар Асадга мактуб йўллагани, унда Асадни президентлик лавозимига қайта сайлангани билан табриклагани маълум бўлган.
