Shimoliy Koreya yetakchisi Kim Chen In 4-iyun, juma kuni KXDR Mehnat partiyasi Markaziy qo‘mitasi Siyosiy byurosining 8-chaqiriq, birinchi yig‘ilishida ishtirok etdi, bu uning 7-maydan buyon birinchi ommaviy chiqishidir. Bu haqda Koreyaning Markaziy telegraf agentligiga tayanib “Korrespondent.net” xabar berdi.
Xabarga ko‘ra, yig‘ilishda Markaziy qo‘mita Siyosiy byurosi prezidiumi a’zolari, partiyaning Markaziy qo‘mita Siyosiy byurosi a’zolari va a’zoligiga nomzodlar ishtirok etgan.
Yig‘ilganlar partiya Markaziy qo‘mitasining plenumini muhokama qilgan. Kim Chen In amaldagi vaziyatni tahlil qilib, birinchi yarim yillikning “aniq” natijalarini sarhisob qilish va rivojlanish yo‘nalishlarini aniqlashtirish uchun Markaziy qo‘mita plenumini chaqirish kerakligini ta’kidlagan. Plenumning mavzusi, xususan, partiya Markaziy qo‘mitasi bo‘limlari kadrlarini qayta tuzishdir. Yig‘ilishda iyun oyining birinchi o‘n kunligida plenum o‘tkazishga qaror qilingan.
“Uchrashuv davomida Kim Chen In ko‘plab muammolar va cheklovlarga duch kelayotgan davlat loyihalarining rivojlanishini yuqori baholadi”, — deyiladi telegraf xabarida.
Shuningdek, respublika rahbari yig‘ilish qatnashchilarini partiyaning yetakchilik rolini oshirishga, uning iqtisodiyotni barqarorlashtirish va takomillashtirish yo‘lidagi “qat’iyatli kurashi”ni rag‘batlantirish choralarini ko‘rishga chaqirgan.
Oxirgi marta Kim Chen In 7-may kuni Pxenyanda o‘tkazilgan konsertda qatnashgan edi. Shimoliy Koreya rahbarining shuncha vaqt jamoat oldiga chiqmaganiga oid ehtimoliy sabablar aytilmagan. Bu uning 2021-yilda eng uzoq muddat jamoat oldida ko‘rinish bermagani hisoblanadi.
Bu vaqt mobaynida 28-may kuni u Suriya prezidenti Bashar Asadga maktub yo‘llagani, unda Asadni prezidentlik lavozimiga qayta saylangani bilan tabriklagani ma’lum bo‘lgan.
Izoh (0)