Юрак касаллиги сабаб бутун бошли ҳаёти ўзгариб кетган Рубен де ла Ред ҳақида ҳикоя

Ҳаёт исталган вақтда энг муҳим режалардан воз кечишга мажбур қилиши мумкин. Ҳаттоки яшаб турган минглаб кунларимизнинг бир лаҳзаси ҳам ҳаётни тубдан ўзгартириб юбориш имкониятига эга. Қаҳрамонимиз Рубен де ла Реднинг ҳикояси ҳам шунга ўхшаш.

Биз ҳикоямизни де ла Редга ва бутун футбол оламига яна бир юқори даражадаги футболчининг фаолияти бошланаётганини билдирувчи ишора берилган лаҳзадан бошлаймиз.

Евро—2008 мусобақаси доирасидаги гуруҳ босқичининг сўнгги турида Испаниянинг Грецияга қарши ўйини бўлмоқда. Даниэль Гуиснинг бош билан тўп узатиши ва Рубен де ла Реднинг пастки бурчакни нишонга олиши. Бу ярим ҳимоячининг терма жамоа сафидаги дебют голи эди. Ўша лаҳза идеал йилнинг кулминацияси бўлди. 23 ёшли футболчи Микаэл Лаудрупнинг камтаргина «Хетафе» жамоасини УЕФА Кубоги чорак финалига чиқишига, Испания Кубогида эса «Валенсия»га қарши финал ўйинида иштирок этишига ёрдам берган. Мавсум сўнгида Испания терма жамоаси бош мураббийи Луис Арагонес уни терма жамоага чақирди. Евро—2008 доирасида де ла Реднинг терма жамоадаги рақобатчилари: Хави, Андрес Иньеста, Давид Сильва, Хаби Алонсо, Маркос Сенна, Сеск Фабрегас ва Санти Касорла каби футболчилар эди. Ундан ташқари де ла Ред Евродан сўнг орзусидаги жамоа — «Реал Мадрид»га ўтганди. Орада турмуш ўртоғи унга фарзанд кутаётгани ҳақидаги хабарни етказади, бу вақтда дунёда гўё Рубендан бахтлироқ одам йўқ эди. Энг қувончли лаҳзаларнинг барчаси бир йилда содир бўлди.

2008 йилги Европа чемпионатида Испания сафидаги биринчи голи (ва терма жамоа билан эришган соврини) эйфорияси унга ўз таъсирини ўтказмай қолмади. Де ла Ред Испания Суперкубогида «Валенсия» дарвозасига 35 метр масофадан гол урди. У «Бернабеу»га қайтаётганини эълон қилди.

Де ла Ред қандай муҳим ишларни амалга оширган? Орадан 12 йил ўтган бўлса-да, унинг фаолияти якунланганини қабул қилиш шу қадар оғир кечаётганига сабаб нима? Ярим ҳимоячининг қайсидир жиҳатини алоҳида таъкидлаш мушкул. Унинг майдонда тўп билан ҳаракатланиши Фернандо Редондони ёдга соларди. Ҳозирда фаолиятини давом эттираётган Дани Парехони унинг прототипи дейиш мумкин.

Де ла Ред марказий ярим ҳимоянинг исталган нуқтасида: таянч, саккизлик ёки ўнликда ҳаракат қила оларди. «Хетафе»да уни асосан таянчга (баъзан ўзини, баъзан шерик билан) қўйишарди, лекин у олдинроққа ўтиб, ўз истеъдодини намойиш этиши учун эркин ҳаракат қилишига рухсат бор эди.

Мухлислар де ла Ред (ёки унинг Мадриддаги шериги Эстебан Гранеро)нинг ўйинини томоша қилиш учун стадионга ташриф буюрарди (ёки телевизордан томоша қиларди). Де ла Ред майдонда бўлса, мухлислар доим хурсанд эди.

Ўша мавсум «Хетафе» учун омадли келди. Лаудруп Рубенга  жамоа ҳужумларини ташкиллаштириш учун асосий футболчи мақомини берди.

Камтаргина бўлган «Хетафе» Мадрид академияси тарбияланувчиси билан биргаликда бутун дунёни ҳайратга солди. «Хетафе»нинг УЕФА Кубогидаги иштирокини сўз билан таърифлаб бўлмайди. Улар гуруҳ босқичида «Тоттенҳэм»ни мағлуб этди. Ўша баҳсда де ла Ред ўз ҳисобига гол ёздириб қўйди. Кейин эса жамоа «Бенфика» клуби билан баҳс олиб борди. «Бенфика»да ўша вақтлар Анҳел ди Мария ва Руи Кошта каби футболчилар тўп сурарди. «Хетафе» иккала ўйинда ҳам ғалаба қозонди ва де ла Ред гол ва голли узатма муаллифига айланди.

Чорак финалда Мюнхеннинг «Бавария»си уларга рақиб бўлди. «Альянц Арена» стадионида 1:1 ҳисобида дуранг натижа қайд этилди. Мюнхенликлар таркибида Франк Рибери, Филип Лам, Бастиан Швайнштайгер, Лусио каби машҳур футболчилар бор эди. Жавоб учрашуви эса жуда қийин кечди. 6-дақиқадаёқ де ла Ред майдондан четлатилди. Шундай бўлишига қарамасдан «Хетафе» гол уриб олди. «Бавария» мағлубиятга яқин эди, аммо 90-дақиқада Рибери гол уриб, жамоасини қўшимча дақиқаларга етаклади. Қўшимча 30 дақиқада «Хетафе» 3:1 ҳисобида олдинда бораётганди, аммо Лука Тони иккита гол урди ва ҳисоб 3:3 кўринишига келди. Меҳмонда урилган гол эвазига «Бавария» кейинги босқичга чиқди. Шу билан «Хетафе» мусобақадаги иштирокига якун ясади.

Ла Лигада «Барселона» ва «Реал» устидан тарихий ғалабалар қайд этилди. Ички чемпионатдаги ютуқлар Испания Кубогида кўзга ташланди. Жамоа финалда Рональд Куманнинг «Валенсия»сига қарши майдонга тушадиган бўлди. Афсуски, финалда омад улардан юз ўгирди. «Валенсия» таркибида Давид Вилья, Давид Сильва, Хуан Мата, Давид Алберт ва Рауль Альбиоль каби футболчилар бор эди.

Унинг Мадридга қайтиши қисқа вақт бўлса ҳам ёдда қоларли бўлди. Юраги касал бўлишидан олдин 11 та ўйинда майдонга тушди. Охирги 5 ўйинда мунтазам асосий таркибда майдонга тушаётганди. Шу вақт ичида 2 та гол ва 2 та голли узатмани амалга оширишга улгурди. Ёзда эса унинг кетиши билан боғлиқ хабарлар кўпайганди. Унга Арсен Венгер ва унинг «Арсенал»и қизиқиш билдираётган эди. Лекин де ла Ред ўз орзуларини рўёбга чиқариш учун жамоада қолишни маъқул кўрди.

«Мен Англия ва Испаниядан таклифлар олдим. Лекин жудаям хотиржамман» – дейди де ла Ред мавсумолди матбуот анжуманида. «Бугун мен «Реал»дан кетишимга сабаб бўладиган имкониятлардан воз кечяпман».

У фақат муваффақиятга эришишни истарди. Уэсли Снейдер ва Гути сингари футболчилар жароҳат олганда, де ла Ред Шустернинг ишончига кириш учун ҳаракат қилди. Рубен ярим ҳимояда етишмаётган стабилликни қайтариб бергандек бўлди. Унинг ўзига бўлган ишончи ўйиндан ўйинга ошиб борарди.

«Хетафе»даги тарихий мавсуми, терма жамоадан чақирув ва ундаги дебют гол, Евро—2008 даги ғалаба, «Реал Мадрид»га қайтиш – барчаси унинг орзулари эди. Ниҳоят мадридликлар ишониши мумкин бўлган яна бир истеъдод етишиб чиққанди. Рауль, Гути ва Касильяс изидан борадиган яна бир кантерано.

Евродаги голидан 3 ой ўтиб ҳаммаси тугади. У фаолиятига якун ясади.

2008 йил 30 октябрда Рубен де ла Ред Қирол Кубогида «Реал Юнион»га қарши баҳсда ҳушини йўқотди. Футболчиларнинг юзида қўрқув аломатлари акс этарди.

Кийим алмаштириш хонасида ўзига келган де ла Ред ҳаётини тубдан ўзгартириб юборадиган воқеани бошидан кечирганини билмасди. Мана шу вазият унинг майдондаги охирги ҳаракати бўлиб қолди. Кейинги 2 йил давомида Рубен жуда кўп мутахассислар ҳузурига қатнади. Унга юрак касаллиги ташхиси қўйилганди. Лекин шифокорлар унинг қандай келиб чиққани-ю, қандай ечим топиш кераклигини аниқ айта олмади. Юрак хуружидан 2 йил ўтиб, 25 ёшида Рубен де ла Ред футболдан кетишини эълон қилди.

Агар у фаолиятини давом эттирганида катта эҳтимол билан муваффақият зинасидан тепага чиқиб борарди. 2009 йилда «Ливерпуль»дан олиб келинган Хаби Алонсо билан жуфтликда «Реал» марказида тўп сурарди, ЖАРда ўтказилган мундиалда Икер ва Рамос билан биргаликда олтин медалларни қўлга киритарди, 2012 йилда эса яна бир бор Евро бош совринини қўлга киритарди. Ҳозирда 35 ёшда бўлган де ла Ред сўнгги 10 йилликда «Реал» ва Испания терма жамоаси сафида жуда кўп совринларга эга чиқиши мумкин эди. Аммо ҳаёт уни оёғидан чалди. 2010 йилда ҳиссиётларга бой хайрлашув анжуманида қатнашди.

«Юрагим билан боғлиқ муаммоларим туфайли фаолиятимни тугатишга мажбур бўлдим. Лекин юрагим ҳамон «Реал Мадрид» учун уриб туради» – деб айтиб ўтди Рубен. «Худди мендагига ўхшаш муаммога дуч келган ва азият чеккан спортчиларни қўллаб-қувватлашга тайёрман. Мен уларга фақат олдинга қарашни маслаҳат бераман. Мен ҳам худди шундай қиляпман».

Рубен ҳозирда Испания телевидениесининг La Liga TV каналида шарҳловчи ва Gol TV’да директор лавозимида фаолият олиб боради.

Рубен де ла Ред тарихи – футбол ишқибозлари ва умуман инсоният учун сабоқ. Ҳозирги лаҳза билан яшашга ҳаракат қилинг.