2021 йилнинг апрелида БМТ Болалар жамғармасининг (ЮНИСЕФ) соғлиқни сақлаш секцияси ва Ўзбекистон ИИВ ЙҲХББ томонидан ўтказилган U-Report онлайн-сўровномасининг натижалари эълон қилинди. Тадқиқотнинг мақсади мактабларда йўл ҳаракати хавфсизлиги тўғрисида ўспирин ва ёшларнинг умумий тушунчасини ўрганишдан иборат, деб ёзади «Gazeta.uz».
Сўровда ўзлари мактабга борадиган ёки фарзандлари мактабга қатнайдиган оилалардан иборат 7,5 мингдна ортиқ респондент иштирок этган. Олинган маълумотлар мактаблар атрофида йўл ҳаракати хавфсизлигини таъминлаш бўйича ҳаракатлар режаси ва стратегиясини ишлаб чиқишда фойдаланилади.
«Мактабингизда йўл ҳаракати хавфсизлигини таъминлаш учун қандай чоралар кўрилган?» деган саволга респондентларнинг учдан бир қисми ҳеч қандай чора кўрилмаганини маълум қилган. Ушбу жавоб вариантини танлаганларнинг энг катта улушлари Сирдарё (44 фоиз), Сурхондарё (42 фоиз) ва Жиззах (41 фоиз) вилоятларида қайд этилган. Навоий ва Қорақалпоғистонда эса бу каби жавоб энг кам танланган (мос равишда 21 ва 24 фоиз).
Мактаблар қаршисида йўл ҳаракати хавфсизлигини таъминлаш мақсадида кўрилган энг кенг чоралар қаторидан «Болалар» (18 фоиз) ва тезлик чекланганига (14 фоиз) оид йўл белгилари ўрнатилгани кўрсатилган. 9 фоизи светофор борлигини қайд этган бўлса, яна 9 фоизида — тезликни камайтирувчи сунъий тўсиқлар, 8 фоизида — тартибга солувчи борлиги маълум қилинган.
Респондентларнинг 4 фоизи «Бошқа» жавоб вариантини танлаган бўлиб, йўл ҳаракати хавфсизлигини таъминлаш борасидаги қуйидаги бир нечта чораларни кўрсатиб ўтган: 1) мактаб маҳалла ёки даҳа ичида жойлашгани сабаб хавфли йўллар мавжуд эмас; 2) ерусти пиёдалар ўтиш жойи ташкил этилган; 3) ЙҲХББ инспекторининг макети ўрнатилган.
Респондентларнинг жавобларига кўра, Ўзбекистондаги ўқувчиларнинг аксарияти мактабга пиёда бориб-келади (75 фоиз). Туманлар ўрасида бу борада бирор сезиларли фарқ йўқ, Тошкентдан бошқа — бу ерда болаларнинг 62 фоизи мактабга пиёда қатнайди. Пойтахтдаги 17 фоиз болаларнинг ота-оналари уларни мактабга машинада олиб бориб қўяди, 9 фоизи автобусда, 6 фоизи — таксида ва 2 фоизи — метрода боради.
«Мактабга элтадиган йўллар хавфсизми?», деган саволга респондентларнинг 51 фоизи салбий жавоб берган. Айниқса, йўллар хавфсиз эмаслигидан пойтахтдаги респондентлар хавотирда — 60 фоиз. Бу каби респондентларнинг юқори улуши Сурхондарё (56 фоиз) ва Бухоро (54 фоиз) вилоятларида ҳам қайд этилган.
Мактабга элтувчи йўллар хавфли эканини асосан катта ёшдаги респондентлар тасдиқлаган. Ушбу вариантни 30 ёшдан катта респондентларнинг 68 фоизи танлаган. Таққослаш учун, 15 ёш бўлган респондентларнинг 22 фоизигина, мактаб йўллари хавфсиз эмас деб ҳисоблайди.
Сўровномада иштирок этганларнинг 8 фоизигина мактабларда Йўл ҳаракати қоидалари ва хавфсизлиги дарслари батафсил ҳамда жуда сифатли ўтилишини таъкидлаган. 17 фоиз респондент «жуда ёмон», 6 фоизи — фан бўлгани билан ўқитувчи йўқ бандини танлаган (Сирдарёда — 9 фоиз). 20 фоиз респондент бу каби дарслар ҳеч қачон ўтилмаганини маълум қилган.
Шунингдек, сўровномада иштирок этганларнинг 19 фоизи мактаблар яқинида Йўл ҳаракати хавфсизлигини таъминлаш сифатини оширишга ЙҲХББ экспертларининг дарсларга таклиф этилишини қайд этган. Айниқса, ушбу фикрни 22 фоиз мактаб ишчилари қўллаб-қувватлаган.
Изоҳ (0)