4 июнь куни соат 22:16 да Талимаржон ИЭС энергоблоки авариявий тўхтагани сабабли «Ўзбекнефтгаз» объектларида электр узилиши кузатилди. Бу ҳақда компания матбуот хизмати хабар берди.
Натижада Шўртан газ кимё мажмуаси, Муборак газни қайта ишлаш заводи, Бухоро нефтни қайта ишлаш заводларининг асосий ишлаб чиқариш қурилмалари иш фаолияти тўхтаб қолган.
Бундан ташқари, Муборак, Шўртан, Газли нефть ва газ қазиб чиқариш бошқармаларига қарашли газ қазиб чиқариш конларида электр энергияси узилиши сабабли ишда тўхталиш рўй берган.
«Зеварда», «Жанубий Кемачи», «Жанубий Ўртабулоқ», «Денгизкўл», «Сомонтепа», «Алан» ва «Кўкдумалоқ», «Шўртан КМПО», «Бетман», «Шимолий Нишон» сиқув компрессор станциялари ҳам тўлиқ тўхтаб қолган.
«Юз берган тўхталишлар «Ўзтрансгаз» АЖга қарашли магистрал газ қувурларига етказиб берилаётган табиий газ сарфи камайишига олиб келмоқда», — дейилади баёнотда.
Таъкидланишича, ҳозирда «Ўзбекнефтгаз» АЖ, «Ҳудудий электр тармоқлари» АЖ ҳамда «Миллий электр тармоқлари» АЖнинг тегишли мутахассислари ҳамкорлигида юзага келган ҳолатни бартараф этиш бўйича тезкор ишларни амалга оширилмоқда.
Эслатиб ўтамиз, 2021 йилнинг январида Марказий Осиё ва Қозоғистонни боғловчи ягона энергетик тизимнинг электр узатиш тармоқларида режадан ташқари содир бўлган узилишлар сабабли аварияга қарши автоматика ишлаб кетганди. Ўшанда Талимаржон ИЭСнинг умумий қуввати 900 мегаватт бўлган иккита БГҚлари ўчирилган. Бунинг натижасида Марказий Осиёнинг ягона энергия тизимини (ЯЭТ) Россия ва Қозоғистоннинг ягона энергия тизими билан боғлайдиган транзит тармоқларида юклама кескин кўтарилган.
Изоҳ (0)