Фарғонада Хитойнинг Liaoning Lide компанияси тахминий қиймати 700 миллионга етадиган, қуввати 1200 мегаваттгача бўлган қуёш электр станцияси қуришни режалаштирмоқда.
Вилоят ҳокимлиги матбуот хизматининг хабар беришича, лойиҳа 2 июнь куни Фарғона вилояти ҳокими Хайрулло Бозоров ва Liaoning Lide компанияси делегацияси ўртасида бўлиб ўтган учрашувда муҳокама қилинди.
Хабарда айтилишича, бу борадаги музокаралар бир неча ойдан буён давом этмоқда. Лойиҳани амалга ошириш учун тақдим этилган ер майдонлари ҳудудида сўнгги техник тадқиқотлар ўтказилмоқда. Яқин кунларда ушбу ишлар якунланиб, лойиҳанинг аниқ қуввати ҳамда қиймати белгиланади.
Ҳозирда БААнинг Masdar, Франциянинг Total Eren компаниялари томонидан Навоий ва Самарқандда ҳар бирининг қуввати 100 мегаватт бўлган қуёш фотоэлектр станциялари қуришга киришилганини айтиб ўтган вилоят ҳокими, Фарғонада амалга оширилиши режалаштирилаётган лойиҳада ҳам киловатт-соат электр энергияси нархи ушбу компаниялар томонидан таклиф этилган тарифлар атрофида бўлиши кераклигига эътибор қаратган.
Хитой компанияси Фарғона водийсидаги қайта тикланадиган энергетиканинг биринчи лойиҳаси учун банк кредитлари эмас, тўғридан-тўғри инвестициялар жалб этиш режалаштирилганини маълум қилган.
Шунингдек, компания ишлаб чиқарилган электр энергиясини 25 йил муддатда сотиб олиши учун «Ўзбекистон миллий электр тармоқлари»га энг мақбул тарифларни тақдим этишга тайёр эканини билдирган.
Изоҳ (0)