Toshkent shahar Bektemir tumanida A.P. ismli fuqaro IIBga murojaat qilib, iPhone X smartfonini xarid qilgan shaxs unga qalbaki valyuta berib ketganini bildirgan va bu borada yordam so‘ragan. Bu haqda poytaxt IIBB axborot xizmati xabar berdi.

Ayol o‘zining telefonini “Olx” mobil dasturi orqali sotuvga qo‘ygan va qurilmani noma’lum shaxsga 500 AQSh dollariga sotgan. Keyinchalik pullar qalbaki bo‘lib chiqqan.

Olib borilgan surishtiruv ishlari davomida bu kabi holatlar Toshkent shaharning bir necha tumanlarida ham sodir etilgani ma’lum bo‘lgan. Xususan, Sherzod ismli fuqaro ham Chilonzor tumani IIBga shu kabi muammo yuzasidan murojaat qilgan: erkak iPhone 11 Pro’sini 700 dollarga sotgan, biroq pullar qalbaki bo‘lib chiqqan.

Ma’lum qilinishicha, Toshkent shahar IIBB va tuman boshqarmalariga qalbaki valyutalar bilan savdo qilinganiga oid o‘nlab murojaatlar kelib tushgan. Holat yuzasidan fuqarolar chaqirtirilib surishtiruv ishlari olib borilganida, ular muayyan haq evaziga o‘zining nomiga SIM-karta olib bergani aniqlangan.

Kuzatuv kameralarida doim bosh kiyim va niqobda ko‘rinish bergan shaxs oxir-oqibat IIB xodimlari tomonidan ushlangan. Aniqlanishicha, u Sergeli tumanida yashovchi F. ismli fuqaro bo‘lib, 1991-yilda tug‘ilgan va muqaddam sudlangan.

“Gumonlanuvchi telefonlarni Qozog‘istonga olib ketuvchi sherigi T.ning ishtiroki hech bir kuzatuv kameralarida aks etmagan va jabrlanuvchilar ham pulni F.dan olgan”, — deyiladi xabarda.

Hozirda jabrlanuvchilarga tegishli o‘nlab mobil qurilmalari bloklangan, ammo gumonlanuvchining so‘zlariga ko‘ra, u o‘tgan bir yil ichida yana ko‘plab telefonlarni qalbaki valyutalarga sotib olgan.

Avvalroq Sirdaryodagi bankda 81 ming yevro qalbaki valyuta aniqlangani, Uchtepada qalbaki 6350 dollarni muomalaga kiritmoqchi bo‘lgan shaxs aniqlangani hamda Andijonda qalbaki dollarlar evaziga 9 ta iPhone 12 sotib olishga, Namanganda esa qalbaki pullarni bankka o‘tkazishga uringan shaxslar ushlangani haqida xabar berilgandi.