Бухоро ҳокими ўринбосари Отабек Қозоқов Ғиждувон эркин иқтисодий зонаси дирекцияси давлат унитар корхонаси директори этиб тайинланди. Бу ҳақда «Дарё»га вилоят ҳокими ахборот хизмати раҳбари Олим Жўраев маълум қилди.
Таъкидланишича, у 2005 йилда Тошкент молия институти (кундузги), 2013 йилда Ўзбекистон Республикаси Банк-молия академияси (кундузги), 2017 йилда Ўзбекистон Республикаси Президенти ҳузуридаги Давлат бошқаруви академиясини (кундузги) тамомлаган.
Меҳнат фаолиятини 2005 йилда Ўзбекистон Республикаси ташқи иқтисодий фаолият «Миллий банк» Бухоро вилояти бўлими Когон тумани филиали мижозларга хизмат кўрсатиш сектори етакчи мутахассиси сифатида бошлаган. Шунингдек, «Миллий банк» Когон тумани филиали кредит иқтисод бўлими бошлиғи-бошқарувчи ўринбосари, «Миллий банк» Ромитан тумани филиали бошқарувчиси, Бухоро вилояти инвестиция бошқармаси бошлиғи, Бухоро вилояти ҳокимининг инвестициялар, инновациялар, хусусийлаштирилган корхоналарга кўмаклашиш, эркин иқтисодий ва кичик саноат зоналарини ривожлантириш масалалари бўйича ўринбосари котибияти мудири лавозимларида ишлаган.
2019 йилдан айни вақтга қадар у Бухоро вилояти ҳокимининг ўринбосари — вилоят инвестициялар ва ташқи савдо бошқармаси бошлиғининг котибияти мудири вазифасида фаолият юритган.
Қўшимча қилинишича, айни кунга қадар Ғиждувон эркин иқтисодий зонаси дирекцияси давлат унитар корхонасини Хайрулла Жўраев бошқариб келган. У Бухоро тумани ҳокими этиб тайинлангандан сўнг, мазкур лавозим бўш турган эди.
Изоҳ (0)