Buxoro viloyatining Romitan hamda Qorovulbozor tumani hokimlarining o‘rinbosarlari faoliyatida kamchilikka yo‘l qo‘ygani sabab lavozimidan olingan va ularning o‘rniga yangi o‘rinbosarlar tayinlangan. Bu haqda “Daryo”ga viloyat hokimligi axborot xizmati rahbari Olim Jo‘rayev ma’lum qildi.

Anvarjon Ochilov.

Foto: Buxoro viloyat hokimligi

Ta’kidlanishicha, Romitan tumani hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Bobur Navro‘zov ishdan olingach, o‘rniga Anvarjon Ochilov, Qorovulbozor hokimining shu lavozim bo‘yicha o‘rinbosari Yunus To‘rayev o‘rniga esa Davlat Jumayev o‘rinbosar etib tayinlangan.

Ma’lumot berilishicha, Romitan hokimiga o‘rinbosar etib tayinlangan Anvarjon Ochilov 1983-yil Buxoro tumanida tug‘ilgan bo‘lib, Buxoro oziq-ovqat va yengil sanoat texnologiyasi institutini tamomlagan. U faoliyati davomida Buxoro viloyat hokimining iqtisodiyot va tadbirkorlik masalalari bo‘yicha birinchi o‘rinbosari kotibiyati mudiri, Buxoro tumani hokimining iqtisodiyot va tadbirkorlik masalalari bo‘yicha birinchi o‘rinbosari lavozimlarida ishlagan. Tayinlovga qadar esa viloyat iqtisodiy taraqqiyot va kambag‘allikni qisqartirish bosh boshqarmasi bo‘lim boshlig‘i sifatida faoliyat ko‘rsatgan.

Davlat Jumayev.

Foto: Buxoro viloyat hokimligi

Qorovulbozor tumani hokimining yangi o‘rinbosari Davlat Jumayev esa lavozimga qadar Romitan tuman davlat soliq inspeksiyasi boshlig‘i sifatida ishlagan. U ham 1974-yil Buxoro tumanida tug‘ilgan bo‘lib, Buxoro oziq-ovqat va yengil sanoat texnologiyasi institutini tamomlagan. Davlat Jumayev 1997-yildan 2020-yilga qadar Buxoro tumani davlat soliq inspeksiyasida turli lavozimlarida, shuningdek, viloyat davlat soliq boshqarmasi boshlig‘ining birinchi o‘rinbosari lavozimida faoliyat yuritgan.