«Эшикни очсам, давлат раҳбари кириб келди». Президент Сурхондарёда «Зулфиячи» қизнинг хонадонида бўлди

Шавкат Мирзиёев 2 июнь куни Термиз шаҳрида қурилган кўп қаватли уйларни бориб кўрди. «Gazeta.uz»нинг ёзишича, бундай турар жойлар жисмоний имконияти чекланган ҳамда «темир дафтар»га киритилган оилаларга имтиёзли тарзда берилмоқда. Шундай хонадонлардан бири 15 йилдан бери беморликнинг синовларини тортган Назира Раҳимовага берилган. Давлат раҳбари Сурхондарёга ташрифи якунида ушбу хонадонда бўлди.

Назира Раҳимованинг қизи Рухшона Абдураззоқова 2018 йили Термиз шаҳрида «Ёш китобхон» республика кўрик-танловининг вилоят босқичида 10−14 ёшгача бўлган иштирокчилар орасида 1-ўринни эгаллаб, республика босқичига йўл олган. У 2020 йилда «Зулфия» номидаги давлат мукофоти билан тақдирланган.

«Шундай фарзандни тарбия қилганингиз учун раҳмат! Ниятларингиз, қилган ҳалол меҳнатингиз, мана олдингиздан чиқди. Одамлар мана шундай шароитларда яшашига биз ҳамма шароитни яратамиз. Худо берган шундай истеъдод билан, шундай қобилият билан, албатта, ҳамма ниятларингиз амалга ошади ва мен битта нарсани айтмоқчиманки, мен сиз билан ғурурланаман!», — деган Президент Рухшонанинг онасига.

«Лекин ҳеч ҳам кутмагандим, бугун, эшик тақиллади очсам, давлатимиз раҳбари оталарча меҳр билан кириб келишлари мени жуда ҳам тўлқинлантириб юборди. Мен-ку, майли, онажоним ўзи бетоб эдилар, мана шундай давлатимиз эътиборини кўриб, қувониб турган вақтларида давлат раҳбари онам ва менинг ҳолимдан хабар олгани келганлари онамга қаттиқ таъсир қилди. Насиб этса келажакда ўз олдимга қўйган мақсадларимни амалда кўрсатиб, яхши натижаларга эришишга астойдил ҳаракат қиламан», — деган Рухшона Президент ташрифи ҳақида.

Давлат раҳбари, шунингдек, ёш оилалардан бири Фаррух Эгамов хонадонида бўлиб, улар билан ҳам суҳбатлашган. Мулоқот давомида Президент «Сурхондарё вилояти бўйича катта режалар белгиладик. Ҳаммасининг тагида битта нарса — инсон манфаати бор. Энди бу уйларни аҳолига адолатли бериш керак. Адолат бўлса қадрига етади», — деб айтган.

Маълум қилинишича, 2021 йилда Сурхондарё вилоятида яна 3500 квартирали кўп қаватли уйлар қурилади. 1460 та оилага ипотека учун субсидия берилади.