Президент Администрациясининг транспорт бўлими бир нечта Mercedes-Benz автомобилларини кимошди савдосига қўйди. Бу ҳақда Давлат активларини бошқариш агентлиги электрон-онлайн аукционларни ташкил этиш марказига таяниб, «Gazeta.uz» хабар берди.
Булар учта Mercedes-Benz E240, битта Mercedes-Benz E320 автомобиллари бўлиб, барчаси техник жиҳатдан хизматга яроқли. Автомобиллар қора рангда, 2003—2004 йилларда ишлаб чиқарилган. Юрган масофаси 378,3 минг километрдан 854,2 минг километргача.
Сотувга қўйилган ушбу автомобилларнинг барчаси PPP авторақамларига эга. Бошланғич нархлар — 129,6 миллион сўмдан 136 миллион сўмгача.
Шунингдек, кимошди савдосига 1996 йилда ишлаб чиқарилган, юрган масофаси 352 минг киломтердан ортиқ, оқ рангли Mercedes-Benz 412 D КА ҳам қўйилган. Унинг бошланғич нархи 188,1 миллион сўмни ташкил этмоқда.
Барча лотлар бўйича аризалар 15 июнгача қабул қилинади, кимошди савдоси 17 июнь куни бўлиб ўтади.
Изоҳ (0)