24 майдан 29 майгача бўлган даврда Тошкент шаҳрида атмосфера ҳавосидаги чангнинг рухсат этилган ўртача кунлик контцентрацияси 2,7 бараварга ошиб кетган. Бу ҳақда 13 та стационар постда ҳавонинг ифлосланиш кузатувлари борасида олиб борилган мониторинг маълумотларига таяниб, «Ўзгидромет» хабар берди.
Маълум қилинишича, ушбу давр мобайнида азот диоксидининг 1,3 бараварга, водород фториднинг эса 2 бараварга ошиши қайд этилган.
Эслатиб ўтамиз, Тошкент шаҳрида 29 май куни соат 21:00 атрофида бошланиб, тахминан, бир соатдан ортиқ давом этган кучли шамол чанг бўронларини келтириб чиқарган. Шу куни чанг бўрони сабаб Бухородан келаётган чартер рейс Тошкентга қўна олмаган. Шунингдек, 1 июнь куни Қарши—Самарқанд йўлида қум бўрони, 31 май куни Наманганда, 2 июнь куни Бухорода кучли шамол ва чанг бўронлари кузатилган.
«Ўзгидромет»нинг ёзишича, Ўзбекистон, шунингдек, Марказий Осиёнинг барча ҳудудлари учун чангли бўрон жуда тез-тез учрайдиган ҳодиса ҳисобланади. Кўпинча бундай ҳодисалар қурғоқчил ҳудудларда — чўл ва ярим чўл ҳудудларда содир бўлади.
«Тошкент қурғоқчил ҳудуд ҳисобланмайди, лекин сўнгги йилларда Ўзбекистонда ва Тошкент шаҳрида жадал суръатлар билан олиб борилаётган қурилишлар жуда катта миқдордаги қум ва чангнинг пайдо бўлишига сабаб бўлмоқда, улар ҳатто кучсиз шамол эсганда ҳам ҳавога кўтарилади», — дейилади хабарда.
Изоҳ (0)